हङकङ प्रहरीले ट्याबलोइट पत्रिका एप्पलका मालिक जिमी लाइ चियिङलाई पक्राउ गरेको छ। नयाँ राष्ट्रिय सुरक्षा कानुनअन्तर्गत जिमी, उनका दुई छोरा र एप्पलका बरिष्ठ कार्यकारीहरूलाई सोमबार पक्राउ गरेको साउथ चाइना मर्निङ पोष्टले जनाएको छ।
प्रहरीले गरेको अपरेशनका क्रममा अहिलेसम्म सात जना पक्राउ परिसकेको छन् भने थप अरूलाई पनि हिरासतमा लिन सक्ने बताइएको छ।
पत्रिकाको मुख्यालयमा छापा हान्न दुई सयभन्दा बढी प्रहरीको टोली पुगेको थियो। उनीहरूले सम्पादकीय विभाग र संवाददाताहरूलाई भने निशाना नबनाएको अधिकारीहरूले बताएका छन्।
जिमीलाई भने प्रहरीले उनकै निवासबाट पक्राउ गरेको बताइएको छ।
उनी विदेशीसँग साँठगाँठ गरेको अभियोगमा पक्राउ परेको अधिकारीहरूले बताएका छन्।
जिमीका एक छोरालाई विदेशी शक्तिसँग मिलेर राष्ट्रिय सुरक्षामा खतरा पुर्याएको आरोप छ भने अर्कालाई धोकाधडी गरेको आरोपमा पक्राउ गरिएको हो।
पत्रिकाका अरू कर्मचारीलाई विदेशीसँग मिलेर राष्ट्रिय सुरक्षामा खतरा पुर्याएको आरोप छ।
७१ वर्षीय जिमी प्रजातन्त्र पक्षधर हुन्। उनी बेइजिङका कदमको निरन्तर आलोचना गरिरहन्थे।
गत जुलाई १ देखि बेइजिङले हङकङमा राष्ट्रिय सुरक्षा कानुन लागु गरेको थियो। सन् २०४७ सम्म एक देश दुई प्रणालीमा हङकङ चल्ने सम्झौता गरेको चीनले एक पक्षीय रूपमा उक्त कानुन लादेको भन्दै पश्चिमा मुलुकले चर्को विरोध गरेका छ्न्।
उक्त कानुन लगाएपछि अमेरिकाले केही दिनअघि हङकङकी प्रमुख कार्यकारी क्यारी ल्यामलगायत अधिकारीहरूमाथि प्रतिबन्ध लगाएको थियो। ल्याममाथि अमेरिकाले प्रतिबन्ध लगाएपछि हङकङ प्रहरीले जिमीलाई पक्राउ गरेको हो।
