जिल्ला प्रशासन कार्यालय पर्सा घेराउ र ज्ञापन पत्र बुझाउन पुगेका नेपाली कांग्रेसको भातृ संस्था नेपाल विद्यार्थी संघका तीन जना कार्यकर्तालाई प्रहरीले पक्राउ गरेको छ।
अस्पतालहरूले बिरामी भर्ना लिन नमानेर मृत्यु हुने गरेको घटनाको विरोधमा नेविसंघले प्रमुख जिल्ला अधिकारीलाई ज्ञापन पत्र बुझाउने कार्यक्रम राखेको थियो। ज्ञापन पत्र बुझाउन जाँदै गरेका नेविसंघ कार्यकर्तालाई प्रहरीले निषेधाज्ञा तोडेको भन्दै नियन्त्रणमा लिएको हो।
प्रहरीले पक्राउ गरेपछि नेविसंघले प्रदर्शन गरेका थिए। अस्पतालहरूमा बिरामीको उपचार हुनुपर्ने, आर्थिक अवस्था कमजोर भएकालाई राहतको व्यवस्था गरिनुपर्ने, कोरोना महामारीमा खटिएका स्वास्थ्यकर्मीलाई उचित सेवा सुविधा दिनुपर्नेलगायत छ बुँदे माग राखेर नेविसंघले ज्ञापन पत्र बुझाउन लागेको थियो।
तर ज्ञापन पत्र बुझाउने समय सिडिओसँग नलिएको भन्दै प्रहरीले उनीहरूलाई हुलहज्जल गरेको आरोपमा नियन्त्रणमा लिएको हो।
जिल्ला प्रहरी कार्यालय पर्साका प्रहरी नायब उपरीक्षक मनोजित कुँवरले निषेधाज्ञा लगाएका बेला प्रशासन कार्यालय अगाडि प्रदर्शन र हुलहुज्जत गरेकोले नेविसंघका कार्यकर्तालाई पक्राउ गरिएको जानकारी दिए।
‘निषेधाज्ञामा प्रदर्शन गर्ने? हुलहुज्जत गर्ने? १५/२० जना आएका थिए अरू भागे तीन जनालाई पक्राउ गरिएको छ,’ उनले सेतोपाटीसँग भने, ‘पक्राउ परेका विकास तिवारीलगायत तीनै जनालाई क्वारेन्टिनमा राख्छौं।’
उनीहरू समूहमा बसेर प्रदर्शनमा सहभागी रहेकोले कोरोना लागेको हुन सक्ने भन्दै क्वारेन्टिनमा राख्न लागिएको उनले जानकारी दिए।
नेविसंघले भने विभिन्न माग राखेर ज्ञापन पत्र बुझाउन जाने क्रममा प्रहरीले लाठीचार्ज गरेको बताएको छ। नेविसंघ अध्यक्ष राजिब ढुंगानाले सोमबार विज्ञप्ति निकालेर पक्राउ परेका नेविसंघका विकास तिवारी, मनोज साह, शिष हजारालाई तत्काल रिहा गर्न माग गरेका छन्। रिहाइ नगरे कडा आन्दोलन गर्ने अध्यक्ष ढुंगानाले चेतावनी दिएका छन्।
पर्सामा कोरोना संक्रमित दिनानुदिन वृद्धि भएपछि प्रशासनले निषेधाज्ञा जारी राखेको छ।
हेर्नुस् नेविसंघको विज्ञप्ति: