चालकलाई कोरोनाभाइरस संक्रमण भएपछि विराटनगर महानगरपालिका मेयर भीम पराजुली सेल्फ क्वारेन्टिनमा बसेका छन्।
महानगरका प्रमुख प्रशासकीय अधिकृत इन्द्रमणि पोखरेललाई आइतबार कोरोना पुष्टि भएपछि मेयर पराजुलीले पनि स्वाब दिएका थिए।
उनको रिपोर्ट कोरोना नेगेटिभ आएको छ।
'अधिकृत ज्यूलाई कोरोना देखिएपछि मैले पनि परीक्षण गराएको थिएँ तर देखिएन। चालकमा पुष्टि भएपछि म सेल्फ क्वारेन्टिनमा छु,' उनले भने।
पराजुली महानगरले नै व्यवस्थापन गरेको जैन भवनको क्वारेन्टिनमा बसेका छन्।
प्रमुख प्रशासकीय अधिकृतलाई कोरोना पुष्टि भएपछि महानगरले सोमबारदेखि अत्यावश्यक बाहेकका सेवा पाँच दिनका लागि बन्द गर्ने निर्णय समेत गरेको छ।
वडा नम्बर १ र २ का वडाअध्यक्षमा समेत कोरोना पुष्टि भएको छ।
बाँकी वडा कार्यालयहरूमा पनि पाँच दिनसम्मको लागि महानगरले अति आवश्यक बाहेकका सेवा बन्द गर्ने निर्णय गरेको मेयर पराजुलीले जानकारी दिएका छन्।
कोरोनाका कारण विराटनगरका १८ जनाले ज्यान गुमाइसकेका छन्