जनता समाजावादी स्थापना भएको झण्डै पाँच महिना वित्न लाग्दा समेत यसको केन्द्रीय कमिटीले अझै पुर्णता पाउन सकेको छैन।
गत वैशाख १० गते समाजवादी पार्टी (सपा) र राष्ट्रिय जनता पार्टी (राजपा) मिलेर जनता समाजवादी पार्टी (जसपा)बनेको थियो। जेठ २० गते दल दर्ताका लागि निवेदन दिएको जसपाले असार २५ गते निर्वाचन आयोगबाट आधिकारिकता पाएको थियो।
जसपामा अहिले पूर्व सपाका तर्फबाट उपेन्द्र यादव र पूर्व राजपाका तर्फबाट महन्त ठाकुर गरी दुई अध्यक्ष छन्।
जसपाका वरिष्ठ नेता राजेन्द्र महतोले केन्द्रीय समिति गठनदेखि संघीय परिषदसम्मको गठनका लागि गृहकार्य भइरहेको बताए।
‘हामीले संघीय परिषद गठन, केन्द्रीय समितिको पुर्णता लगायतका काम गर्छौँ। पदाधीकारीको चयन र नेताहरुलाई जिम्मेवारी दिन पनि बाँकी छ’ उनले भने, ‘अहिलेसम्म त्यस्तो कुनै खालको जटिलता छैन। लकडाउनले गर्दा छलफल र भेलाको लागि केही प्रभाव परेको हो। हामी छिट्टै टुंगो लगाउछौं।’
जसपामा ७ सय १ जनाको केन्द्रीय कमिटी, १ सय ५१ जनाको राजनीतिक समिति, ५३ जनाको कार्यकारिणी समिति गठन गर्ने भनिएपनि कार्यकारीणी समिति मात्रै क्रियाशिल बनेको छ। कार्यकारीणी समितिमा पनि अझै २ जना सदस्य थप्न बाँकी रहेको छ। त्यस्तै ११ सय १ जनाको संघीय परिषद गठन गर्ने काम पनि अघि बढेको छैन।
पूर्व समाजवादी पार्टीका महासचिव समेत रहेका जसपाका कार्यकारिणी सदस्य रामसहाय प्रसाद यादवले ठूलो संख्यामा रहेको केन्द्रीय कमिटीलाई सानो संख्यामा झार्नलाई समस्या आएको बताए।
‘पूर्व समाजवादी पार्टीमा भन्दापनि पूर्व राजपामा धेरै संख्या छ। १ जना हटाउन पनि समस्या हुन्छ’ उनले भने, ‘केन्द्रीय कमिटीबाट हटाइएका साथीहरुलाई कहाँ जिम्मेवारी दिने भन्ने नटुंगिदा पनि यस्तो भएको छ। अब यसलाई धेरै समय लगाउनु हुँदैन। किनकि केन्द्रमा समायोजनको काम ढिलो हुँदा प्रदेश र जिल्लामा पनि समस्या परिरहेको छ।’
जसपाको ७ सय १ केन्द्रीय सदस्यका लागि पूर्व सपाको भागमा ३ सय ५१ र पूर्व जसपाको भागमा ३ सय ५० जना केन्द्रीय सदस्य पर्नेछन्। पूर्व सपाको केन्द्रीय कमिटी ४ सय ३१ बाट ३ सय ५१मा झार्न भन्दा पूर्व राजपाको ७ सय १ जनाको केन्द्रीय कमिटी भएकाले ३ सय ५०मा झार्न कठिन भएको हो।
अर्कोतिर पूर्व राजपा ६ वटा पार्टी मिलेर गठन भएकाले समेत थप समस्या आएको हो।
पूर्व राजपाको भागमा परेको ३ सय ५० जना केन्द्रीय सदस्यमध्ये अध्यक्ष मण्डलका ६ जनालाई भाग लगाइएको छ। जसमा महन्थ ठाकुर र राजेन्द्र महतोको भागमा ९५/९५ जना परेको छ। शरतसिंह भण्डारी र महेन्द्र राय यादवलाई ४४/४४ जना परेको छ।
त्यस्तै राजकिशोर यादव र अनिल झालाई ३०/३० जना केन्द्रीय सदस्य भागमा परेको छ। राजपासँग विभिन्न चरणमा एकता गरेका जनशक्ति पार्टी, जनमुक्ति पार्टी र खुम्बुवान पार्टी लगायतको भागमा १२ जना परेको छ। आफ्ना भागमा परेका सदस्यहरुको नाम महेन्द्र राय यादव र राजकिशोर यादवले नदिएका कारण समस्या आएको पूर्व राजपाका तर्फबाट जसपाको कार्यकारीणी सदस्य बनेका एक सदस्यले सेतोपाटीलाई बताए।
जसपा अध्यक्ष उपेन्द्र यादव पूर्व राजपामा खेल्न खोजेका कारणले समस्या उत्पन्न भएको ती सदस्यको आरोप छ। ‘उपेन्द्रजीले महेन्द्रजी र राजकीशोरजीलाई तपाईंहरु नमान्नुस भनिरहनुभएको छ। अनिलजीलाई पनि यसकै लागि कोसिस भइरहेको छ’ उनले भने ‘एकातिर उहाँहरु संख्या कम भयो भन्दै हुनुहुन्छ अर्कोतिर अर्को गुट र केन्द्रीय कमिटीमा नभएका व्यक्तिहरुको नाम ल्याइरहनुभएको छ।’
पूर्व राजपा स्रोतका अनुसार ६ जनाले आफ्नो तर्फबाट नाम बुझाउँदा आफ्ना पूर्व पार्टीका तर्फबाट निर्वाचन आयोगमा बुझाइएका नाम मध्येबाटै बुझाउनुपर्नेछ। तर महेन्द्र यादव र राजकिशोर यादवले त्यस्तो नगर्दा समस्या आएको अर्का कार्यकारीणी सदस्यले बताए।
‘दुई पार्टी एक भएपछि के के नै होला भनेको तर अहिले त कुनै गतिबिधि समेत हुन पाएको छैन। हामीले वैकल्पिक शक्ति बनाउन सकिन्छ कि भनेर पार्टी एकता गर्यौ। तर उपेन्द्रजीले शक्ति सञ्चय गर्ने कोसिस गरिरहनुभएको छ’ उनले भने, ‘असन्तुष्टहरुलाई उचालेर उपेन्द्रजीले झन अफ्ठ्यारो बनाइदिनुभएको छ। उहाँले गुट उपगुटको खेल खेल्नुभयो। बाबुरामजीको भने भूमिका सन्तुलनकारी छ।’
पूर्व सपाका असन्तुष्ट पक्ष भने पर्ख र हेरको रणनीतिमा रहेको ती कार्यकारीणी सदस्यले बताए। पूर्व राजपा अध्यक्ष मण्डलका सदस्य एवम् जसपा नेता महेन्द्र राय यादवले पार्टी एकता प्रक्रियाको काम भइरहेको बताए।
‘मिडियामा त अनेक कुरा आउँछन्। पार्टीमा काम भइरहेको छ’ उनले भने ‘नामहरु पठाउन कुनै समस्या छैन। हामी यसबारे छिट्टै निर्णय गर्छौँ।’
पूर्व राजपा महामन्त्री समेत रहेकी जसपा नेतृ चन्दा चौधरीले केन्द्रीय कमिटीलाई पुर्णता दिने, संघीय परिषद गठन गर्ने, पदाधीकारीको चयन लगायतका काम २,३ दिनभित्रै गरिने बताइन्।
पूर्व समाजवादी पार्टीका उपाध्यक्ष समेत रहेका जसपा नेता नवराज सुवेदीले भइसकेका केन्द्रीय सदस्यहरुलाई कसरी व्यवस्थापन गर्ने भन्ने निर्णय हुन नसक्दा केही ढिलो भएको बताए।
