मधेसी निजामती कर्मचारी मञ्चले विद्यमान नियमावली अनुसार आधिकारिक ट्रेड युनियनको निर्वाचन नगराउन माग गरेको छ।
आधिकारिक ट्रेड युनियनको निर्वाचन असोज २४ गते गर्ने मिति तय गरिएको छ।
कोभिड-१९ को महामारीको बेला निर्वाचन गराउन अप्ठ्यारो हुने र विद्यमान नियमावलीले अन्याय गर्ने भन्दै मञ्चले निर्वाचन स्थगन गर्न माग गरेको हो।
मञ्चको सो माग सम्बोधन गर्न प्रदेश २ का मुख्यमन्त्री लालबाबु राउतले सोमबार संघीय मामिला तथा सामान्य प्रशासन मन्त्रालयमा पत्र पठाएका छन्।
कर्मचारी संगठनहरूमा थ्रेसहोल्डको व्यवस्था गरिएको छ। जसअनुसार राष्ट्रियस्तरको कर्मचारी संगठन बन्न १० प्रतिशत थ्रेसहोल्डको व्यवस्था नेपाल निजामती कर्मचारी नियमावलीमा गरिएको छ।
तर, राजनीतिक पार्टीलाई चाहिँ ३ प्रतिशत थ्रेसहोल्डको व्यवस्था गरिएकाले सोही अनुरूप हुनुपर्ने मञ्चको माग छ।
यसबारे परेको मुद्दा सर्वोच्च अदालतमा विचाराधीन छ।
‘थ्रेसहोल्डको व्यवस्था अव्यवहारिक रहेकाले हामीले सच्याउन माग गरेका हौं,’ मञ्चका अध्यक्ष भुवनेश्वर चौधरीले भने।
२०७३ सालमा नियमावली संशोधन गर्दै सरकारले उक्त व्यवस्था लागू गरेको थियो। त्यसले तराई तथा मधेसबाट प्रतिनिधित्व गर्ने कर्मचारी संगठनको दायरा खुम्चिएको आरोप मञ्चको छ।