नेपाल विद्यार्थी संघले लिम्पियाधुरा, कालापानी, लिपुलेक समावेश गरेको संशोधित नक्सा उल्लेख गरिएको पुस्तक विद्यार्थीलाई उपलब्ध गराउन माग गरेको छ।
शिक्षा मन्त्रालय अन्तर्गत पाठ्यक्रम विकास केन्द्रले कक्षा ९ देखि १२ सम्मका विद्यार्थीका लागि तयार पारेको सन्दर्भ सामग्री पुस्तक तथ्यगत त्रुटि हुन सक्ने भन्दै प्रधानमन्त्रीले अहिले वितरण नगर्न निर्देशन दिएका थिए।
नेविसंघ सिटिइभिटी केन्द्रीय समन्वय समितिले मंगलबार माइतीघर मण्डलमा प्रदर्शन गर्दै संशोधित नक्सा भएको उक्त पुस्तक वितरण गर्न माग गरेका हुन्।
उक्त पुस्तक विद्यार्थीलाई उपलब्ध गराउन ढिलाइ गर्न नहुने नेविसंघ महामन्त्री दीपक भट्टराईले बताए। केही त्रुटि भए सच्याएर भए पनि उक्त पुस्तक तत्काल वितरण गर्नुपर्ने उनको भनाइ छ।
तर पुस्तकमा तथ्यगत त्रुटि छ भन्ने बाहनामा पुस्तक वितरणमा सरकारले ढिलाइ गर्न नहुने उनले बताए। नेविसंघ सिटिइभिटी संयोजक महेन्द्र शाहीले संशोधित नक्सा शैक्षिक गतिविधिमा समाविष्ट गर्न दवाव स्वरूप प्रदर्शन गरिएको बताए।
प्रधानमन्त्रीले केही दिन अगाडि मन्त्रिपरिषदमा उक्त पुस्तकमा तथ्यगत त्रुटि हुन सक्ने भन्दै परराष्ट्र, शिक्षा र भूमिसुधार मन्त्रीलाई आवश्यक अध्ययन गरी जानकारी गराउन निर्देशन दिएका थिए।