कोरोना भाइरसको उपचारका लागि वाल्टर रिड सैनिक अस्पताल भर्ना भएका अमेरिकी राष्ट्रपति डोनाल्ड ट्रम्प ह्वाइट हाउस फर्किएका छन्।
कोरोना पोजेटिभ भएपछि उनलाई तीन दिन सैनिक अस्पतालमा भर्ना गर्नुपरेको थियो।
अस्पतालबाट ह्वाइट हाउस आएका ट्रम्पले यसै वर्षको नोभेम्बर ३ मा हुने राष्ट्रपति चुनावको प्रचारमा छिट्टै फर्किने चाहाना व्यक्त गरेका छन्।
'छिट्टै चुनाव प्रचारमा फर्किनेछु', अस्पतालबाट निस्केपछि ट्रम्पले ट्विट गरेका छन्।
त्यसअघि ह्वाइट हाउसका चिकित्सक डा. शिन केन्लीले ट्रम्पको स्वास्थ्यमा सुधार भइरहेको बताउँदै अस्पतालबाट छुट्टी लिनसक्ने बताएका थिए।
चिकित्सकहरूले ट्रम्प पूर्णरूपमा ठीक नभएपनि घर जानका लागि सुरक्षित भएको बताएका छन्।
ट्रम्पको बाँकी उपचार ह्वाइट हाउसमा नै हुनेछ।
अस्पतालबाट निस्कनुअघि ट्रम्पले 'छिट्टै चुनावको प्रचार गर्नेछु। झुटा समाचारहरू खाली मत सर्वेक्षणमात्र देखाउँछन्' भन्दै ट्विट गरेका थिए।
चिकित्सकहरूले ट्रम्पको स्वास्थ्यमा सुधार भइरहेको बताएपनि सोका बारेमा विस्तृत जानकारी भने दिएका छैनन्।
डा. केन्लीले ट्रम्पलाई एन्टिभाइरल रेमडेसिविरसँगै डेक्सामेथासोन नामक स्टेरोइड दिइएको जानकारी दिएका छन्। उनलाई रेमडेसिविरको तीन मात्रा दिइएको बताए।
अब यसको चौथो मात्रा डिस्चार्ज हुनुअघि दिइनेछ भने पाँचौ मात्रा ह्वाइट हाउसमा दिइनेछ।