स्वास्थ्य तथा जनसंख्या मन्त्री भानुभक्त ढकालले कोरोना संक्रमितको उपचार खर्च परिवारले गर्न नसके सरकारले व्यहोर्ने बताएका छन्।
मंगलबार मन्त्रालयको नियमित प्रेस ब्रिफिङमा मन्त्री ढकालले विरामी वा परिवारले उपचार गर्न नसक्ने घोषणा गरेको अवस्थामा त्यस्ता व्यक्तिहरूको सम्पूर्ण परीक्षण र उपचार खर्च सरकारले बेहोर्ने गरी व्यवस्था मिलाइएको जनाए।
साथै उक्त निर्णयको कार्यान्वयन गर्दा कुनै पनि व्यक्ति वा निकायको सिफारिस नपर्ने गरी सहज प्रणालीको व्यवस्था समेत मिलाइएको उनले बताए। संक्रमितले आफ्नै खर्चमा परीक्षण र उपचार गर्नुपर्ने निर्णय सरकारले गरेपनि सात वटा आधार भएका व्यक्तिहरूको निशुल्क नै उपचार गरिने जनाएको छ।
यसरी निशुल्क उपचार सेवा पाउनेहरूमा विपन्न वर्ग, अशक्त, असाहय एकल महिला, अपांगता, ७० वर्ष पुगेका नागरिक र फ्रन्टलाइनमा काम गर्ने कर्मचारीहरू छन्।
यी व्यक्तिहरूको हकमा पनि बीमा गरिएको अवस्थामा स्वयम्को बीमा रकमबाट उपचार खर्च कटौति गरिने भनिएको छ।
'देशभर ६ हजार बढि बेड थप गर्दैछौं'
मन्त्री ढकालले देशभर ६ हजार बढी बेड थप्ने कार्य अगाडि बढेको बताएका छन्।
उनले तीन वटै तहमा गरेर कुल ६ हजार २ सय २ वटा बेड थप्ने कार्य अघि बढेको जानकारी दिए। त्यसका लागि ६ सय ४९ वटा स्थानीय तहमा पाँच बेडको अस्पताल स्थापना गरी सञ्चालन गर्न आवश्यक बजेट पठाइएको पनि जनाए।
तोकिएको सबै स्थानीय तहमा पाँच बेडको अस्पताल तयार भए त्यहाँबाट ३ हजार २ सय ४५ बेड थपिने मन्त्री ढकालले बताए।
यस्तै जिल्लास्थित रहेका ५८ वटा असपतालहरूलाई पनि २५ र ५० बेडमा स्तरन्नोति गरिने भन्दै उनले त्यहाँबाट पनि ९ सय २२ बेड थपिने जनाए।
साथै साविकका ११ वटा अञ्चल, उपक्षेत्रीय र क्षेत्रीय अस्पतालहरूलाई पनि २ सय बेडमा स्तरोन्नति गर्ने भनिएको छ। ती अस्पतालहरूमा बेड विस्तार भएप नि एक हजार ३५ बेड थपिने छन्।
मन्त्री ढकालले प्रदेशस्थित सात संघीय अस्पतालहरूलाई पनि पाँच सय बेडमा स्तरोन्नति गरिने जनाए। जसले गर्दा कुल ६ हजार २ सय २ वटा बेड थपिने उनको भनाइ छ।