नेत्र विक्रम चन्द (विप्लव) नेतृत्व नेपाल कम्युनिष्ट पार्टीले सरकारविरूद्ध देशव्यापी विरोध कार्यक्रमको घोषणा गरेको छ।
विप्लव पार्टीले बुधबार विज्ञप्ति जारी गर्दै सरकारले कोरोना भाइरसको परीक्षण र उपचार नि:शुल्क गर्नुपर्ने, अग्रपंक्तिमा खटिएकाहरूलाई विशेष सुविधा दिनुपर्ने मागसहित विरोध गर्न लागेको हो।
महामारीले आक्रान्त भएका जनतालाई राहत पुर्याउनुको सट्टा स्वास्थ्य परीक्षण गर्नुबाट पन्छिएको भन्दै विरोध गर्न लागेको पार्टीले जनाएको छ।
पार्टीले सरकारसँग कोरोना भाइरसको नि:शुल्क परीक्षण र उपचारको व्यवस्था गर्न माग गरेको छ।
अग्रपंक्तिमा खटिएका सुरक्षाकर्मी, स्वास्थ्यकर्मी, सफाइकर्मी लगायतलाई विशेष आर्थिक सुविधा, स्वास्थ्य र सामाजिक सुरक्षाको उचित व्यवस्था गर्न समेत आग्रह गरेको छ।
साथै, संकटको जनताको स्वास्थ्यमा खेलबाड गरी सम्पत्ति कुम्ल्याउने माध्यम नबनाउन भन्दै चेतावनी दिएको छ।
पार्टीले तीन दिनको लागि विरोध कार्यक्रमहरू आयोजना गर्न लागेको विज्ञप्तिमा उल्लेख छ।
कात्तिक १५ गते कोणसभा गर्ने, १७ गते पर्चा वितरण र २० गते विरोध जुलुस निकाली विरोध गर्न लागेको पार्टीले जनाएको छ।
