नेकपा अध्यक्ष पुष्पकमल दाहाल 'प्रचण्ड'ले पर्सामा मारिएका आफ्ना कार्यकर्ता मुकेश चौरसियाको हत्याका दोषीलाई कारबाही गर्न माग गरेका छन्। प्रचण्डले आज एक विज्ञप्ति जारी गर्दै हत्याका दोषी जोसुकै भए पनि कारबाही गर्नुपर्ने माग गरेका हुन्।
उनले स्थानीय निकायले मुद्दा दर्ता गर्न नमान्नुलाई आश्चर्यको विषय समेत भनेका छन्।
'हत्या जस्तो जघन्य अपराध हुँदा समेत अनुसन्धानसँग सम्बन्धित स्थानीय निकायले मुद्दा दर्ता गर्न आनाकानी गर्नु आश्चर्यको विषय बनेको छ,' उनले विज्ञप्तिमा भनेका छन्, 'म केन्द्र सरकारलाई अविलम्ब दोषीमाथि कारबाहीको प्रक्रिया अगाडि बढाउन आग्रह गर्दै मृतकप्रति हार्दिक श्रद्धाञ्जली र शोकाकुल परिवारजनमा समवेदना प्रकट गर्छु।'
उनले चौरसियालाई सहिद घोषणा गर्न समेत माग गरेका छन्।
'यस सम्बन्धमा पार्टी जिल्ला कमिटीका इन्चार्ज, अध्यक्ष र सचिवका तर्फबाट हत्याको भर्त्सना गर्दै चौरसियालाई सहिद घोषणा गर्न तथा हत्यारालाई कडा कारबाही गर्न माग गर्दै वक्तव्य जारी भएको पनि विदित नै छ,' प्रचण्डले भनेका छन्, 'म पार्टी केन्द्रको कार्यकारी अध्यक्षको हैसियतले उक्त वक्तव्यको समर्थन गर्दै दोषी जोसुकै भए पनि कानुनी कारबाहीको दायरामा ल्याउन सरकारसँग जोडदार माग गर्छु।'
कात्तिक ६ गते पर्सा जिल्लाको विन्दवासिनी गाउँपालिका पार्टी कमिटीको सपथ ग्रहण कार्यक्रममा भएको आक्रमणमा परी नेकपा जिल्ला समिति सदस्य तथा गाउँपालिका सचिव मुकेश चौरसियाको हत्या भएको थियो।
