पर्सा, विन्दवासिनी गाउँपालिका पार्टी कमिटीका सचिव मुकेश चौरसियाको हत्यारालाई कारबाही गर्न नेकपाका ३७ केन्द्रीय सदस्यले माग गरेका छन्।
कात्तिक ६ गते विन्दवासिनी गाँउपालिकाको शपथ ग्रहणमा दोहोरो झडप हुँदा घाइते भएका चौरसियाको उपचारका क्रममा ज्यान गएको थियो।
स्थायी समिति सदस्य मातृका यादवसहित प्रदेश दुईबाट प्रतिनिधित्व गर्ने ३७ केन्द्रीय सदस्यले चौरसियाको हत्यारालाई कारबाही माग गर्दै वक्तव्य निकालेका हुन्। ओली पक्षका कुनै पनि केन्द्रीय सदस्यको नाम वक्तव्यमा छैन।
वक्तव्यमा घटनालाई सुनियोजित भनिएको छ भने जाहेरी दर्ता नभएकोमा कानुनी शासनको खिल्ली उडाइएको भनिएको छ।
'घटनाको प्रकृति हेर्दा सुनियोजित देखिन्छ। हत्या गर्ने उद्देश्यसहित आक्रमण भएको प्रमाणित हुन्छ। यस घटनाको जति भर्त्सना गरे पनि कमै हुन्छ। त्यसैले यस घटनाका सम्पूर्ण दोषीलाई कडाभन्दा कडा कारबाही गरिनुपर्छ,' प्रेस वक्तव्यमा भनिएको छ, 'हामीलाई प्राप्त जानकारी अनुसार पीडित निवेदकको जाहेरी जिल्ला प्रहरी कार्यालय पर्सा वीरगञ्जले अहिलेसम्म दर्ता गरेको छैन। जाहेरी दर्ता समेत नगर्नुले प्रहरीबाट कानुनी राज्यको खिल्ली उडाइएको देखिन्छ।'
उनीहरूले प्रहरी आफ्नो कर्तव्यबाट च्युत भएको आरोप लगाउँदै जिल्ला प्रहरी प्रमुखबाट अमुक व्यक्तिको नाम राख र अमुक व्यक्तिको हटाऊ भनेर अपराधलाई प्रश्रय दिएको उल्लेख गरेका छन्।
हस्ताक्षर गर्नेमा यादवका साथै प्रदेश सह-इन्चार्ज विश्वनाथ शाह, नागेन्द्र चौधरी र महेन्द्र पासवान छन्। त्यस्तै केन्द्रीय सदस्य रामचन्द्र झा, शत्रुधनप्रसाद महतो, योगकुमार बरबरिया, श्रीप्रसाद साह, यदुवंश झा, सुधीरप्रसाद साह, अजयशंकर नायक, राजु खड्का, बोधमाया यादव, भरतप्रसाद साह लगायत छन्।