प्रधानमन्त्री केपी शर्मा ओलीले संविधानको मर्मविपरित संसद विघटन गराएको विरोधमा जनता समाजवादी पार्टीले जनकपुरधाममा प्रदर्शन गरेको छ।
जसपाले देशव्यापी प्रर्दशन गर्ने निर्णय गरेकाले प्रदेश २ को अस्थायी राजधानी जनकपुरधाममा विरोध प्रदर्शन गरिएको हो।
जनकपुरधाममा जसपाका नेता तथा कार्यकर्ताहरूले र्याली निकाल्दै प्रधानमन्त्री तथा राष्ट्रपतिको विरोधमा प्रदर्शन गरेका छन्।
जनकपुरधामको जनक चोकबाट सयौं नेता कार्यकर्ताहरू नगर परिक्रमा गर्दै पुनः जनक चौकमै पुगी कोण सभामा परिणत भई सम्पन्न भएको थियो।
र्यालीमा जसपाका विभिन्न भातृ संघ संगठनका प्रतिनिधि, जिल्ला तथा प्रदेश स्तरका नेता र प्रदेश सभा तथा स्थानीय तह जनप्रतिनिधिहरूको उपस्थितिमा गरिएको प्रदर्शनमा प्रधामन्त्री ओली मुर्दावाद, राष्ट्रपति मुर्दावाद, संसद विघटनको अलोकतान्त्रिक गैरसंवैधानिक कदम खारेज गर र प्रम ओलीको निरकुंशताविरूद्ध लोकतान्त्रिक शक्तिहरू एकजुट होऔं लगायतका नारा लगाएका थिए।
कोण सभामा जसपाका नेताहरूले प्रधानमन्त्री ओलीले एकलौटी रूपमा संसद विघटन गरेर निरकुंशता प्रवृति देखाएको बताए।