नेपाली कांग्रेसका नेता गगन थापाले बहुमत प्राप्त प्रधानमन्त्रीलाई संसद विघटनको अधिकार संविधानले नदिएको बताएका छन्।
कांग्रेस बुटवल नगर समितिले बिहीबार आयोजना गरेको विरोध सभामा बोल्दै थापाले संविधानका कुनै पनि धारा, उपधाराले बहुमत प्राप्त प्रधानमन्त्रीले संसद विघटन गर्न पाउने व्यवस्था नभएको प्रष्ट पारेका हुन्।
संविधान लेख्दा नशामा लठ्ठ परेर नलेखेको भन्दै प्रधानमन्त्री केपी शर्मा ओलीले संसद विघटन गर्नु असंवैधानिक भएको बताए।
‘संविधान पल्टाएर, बुझेर र जानेरै संविधानको धारा ७६ लेखेको हो। नशामा लठ्ठ परेर होइन,’ उनले भने।
संवैधानिक इजलासमा बहुमत प्राप्त प्रधानमन्त्रीलाई काम गर्न नदिएको अवस्थामा के गर्ने भनेर प्रधानन्यायाधीशले बारम्बार प्रश्न गरेको भन्दै नेता थापाले बहुमत प्राप्त प्रधानमन्त्रीले संसद भंग गरेको स्मरण गर्दै ‘कि घर बस्ने घरमा, बस्न मन नलागे बनमा बस्ने’ भन्दै व्यङ्ग गरे।
उनले संविधानमै नभएको व्यवस्था अनुसार संसद विघटन गरेकै कारण पूर्वप्रधानन्यायाधीश समेत एक ठाउँमा उभिएर सरकारको ध्यानाकर्षण गराएको जिकीर गरेका छन्।
‘संविधानमा कहीँकतै बहुमत प्राप्त प्रधानमन्त्रीले संसद विघटन गर्न पाउँछ भन्ने उल्लेख छैन। त्यसैले पनि पूर्वप्रधानन्याधीशहरू एक ठाउँमा उभिएर बोले’, थापाले भने, ‘यसबाट पनि प्रष्ट हुन्छ कि, ओलीको कदम असंवैधानिक मात्र होइन अनाधिकृत पनि हो।’
उनले संसद विघटनको काम आफ्नो अधिकारमा नभएको अवस्थामा पनि प्रधानमन्त्रीले विघटन गरेको भन्दै त्यो कदम अनाधिकृत भएको बताए।