विवेकशील साझा पार्टीका अध्यक्ष रविन्द्र मिश्रले सर्वोच्च अदालतले संसद पुनर्थापना गर्ने निर्णय गरेकोमा स्वागत गर्दैं जे हुनु पर्थ्यो, त्यहीँ भएको प्रतिक्रिया दिएका छन्।
मंगलबार साँझ सामाजिक सञ्जालमा प्रतिक्रिया दिँदै उनले भने, ‘जे हुनु पर्थ्यो, त्यो भयो। सर्वोच्चको आजको फैसलाले दूरगामी ऐतिहासिक महत्व राख्नेछ। लोकतन्त्र र संविधानवादको चीरहरण गरेर लोकतान्त्रिक माध्यमबाटै तानाशाह बन्ने ओलीको प्रयास विफल भएको छ। तर नेपाली राजनीतिमा ओली प्रवृत्ति समाप्त भएको छैन। ओलीको विकल्प देउवा, प्रचण्ड हुन सक्दैनन्।’
उनले अगाडि भनेका छन्, ‘निर्णय जे सुकै आए पनि, प्रधानमन्त्री ओलीले विविध जटिलताका बाबजुद स्थिर देखिन थालेको नेपाली राजनीतिलाई अनावश्यक रूपमा भुङ्ग्रोमा जोतेका छन्। कुनै न कुनै समयमा चुनाव त भइहाल्नेछ। यो अपराधलाई नेपाली जनताले क्षमा नगरुन् भन्ने कामना गर्दछु।’