प्रधानमन्त्री केपी शर्मा ओलीले एउटा एकसिंगे गैंडाको एक महिनाको खाना, उपचार लगायत पालनपोषणको सम्पूर्ण जिम्मा लिएका छन्।
आफूले कोभिड रहुन्जेल तलब नलिने घोषणा गरेकाले एक महिनाको गैंडाको खाना बराबर श्रीमती राधिका शाक्यको पेन्सनबाट उपलब्ध गराउने प्रतिबद्धता उनले व्यक्त गरे। त्यस्तै, उक्त गैंडाको एक वर्षको खाना सरकारले उपलब्ध गराउने पनि उनले बताए।
राष्ट्रिय प्रकृति संरक्षण कोषले विश्वजन्तु दिवस तथा सदर चिडियाखानाको रजत महोत्सवको अवसरमा बुधबार ललितपुरमा गरेको कार्यक्रमलाई सम्बोधन गर्दै प्रधानमन्त्री ओलीले 'एडप्ट एन एनिमल' कार्यक्रमअन्तर्गत एउटा गैंडाको वर्षभरीको सम्पूर्ण खर्चको जिम्मा लिएका हुन्।
उनले चिडियाखानालाई सरकार तर्फबाट चारवटा विद्युतीय बग्गी उपलब्ध गराउने प्रतिबद्धता जाहेर गर्दै विभागीय मन्त्रीलाई त्यसको व्यवस्था गर्न निर्देशन दिए।
बूढाबूढी, अशक्तलाई चिडियाखाना घुम्न सहज बनाउन विद्युतीय बग्गी अत्यावश्यक भएको उनले बताए।
मानिसलाई सहयोग गर्न मानिसहरू तयार रहे पनि जनावरलाई सहयोग गर्ने चलन विकास नभएको र त्यसका लागि 'एडप्ट एन एनिमल' कार्यक्रम सहयोगी हुने उनले बताए। उनले सम्बोधन क्रममा प्रकृति, जीवन र जगतबारे प्रवचन नै दिए। एकसिंगे गैंडाबारे लामो व्याख्या पनि गरे।
‘जु संकटमा पर्यो। कर्मचारीलाई त तनखा दिन्छौं होला, थोरै भए पनि। पचास प्रतिशत भए पनि। यी जनावर त कोही पनि नआएपछि त पचास प्रतिशत पनि हुँदैन। संकटमा परेनन्? यिनलाई संकटमा पर्न नदिन हामी विभिन्न उपाय गर्छौं। जसमध्ये एडप्ट एन एनिमल एक हो। यो एकसिंगे गैंडा नजिकै गयो भने त्यत्ति राम्रो मान्दैन। एडप्ट गरेपछि त अलि राम्रो मान्नुपर्ने नि? नजिक गयो भने त्यत्ति राम्रो मान्दैन। तै पनि यो यसै धर्तिमा जन्मेको हो। यो एकसिंगे गैंडा, यसका पुर्खा न अन्त जान्थे, न अन्त पैदा हुन्थे। यो अमेरिकामा जन्मिँदैन। अमेरिकामा बसोबास गर्न बसाइँ पनि जाँदैन। डिभी पनि काट्दैन यसले। यसलाई नेपाल प्यारो छ। नारायणीको किनार राम्रो छ। यो ओरिजिनल्ली नेपाली हो,’ प्रधानमन्त्री ओलीले भने।
कार्यक्रममा कोषका सदस्य सचिव शरद अधिकारीले कोषले सरकारको लक्ष्यअनुसार संरक्षित क्षेत्रको संरक्षण तथा विस्तारमा उत्साहका साथ काम गरिरहेको बताए।
प्रधानमन्त्री ओलीले अन्तर्राष्ट्रिय मञ्चमा नेपालको संरक्षित क्षेत्र बढाएर हालको २३ बाट ३० प्रतिशत पुर्याउने कुरा बताउँदै आएको उल्लेख गर्दै उनले प्रधानमन्त्रीको उद्घोष कार्यान्वयन गर्न कोषको भूमिका बढेको बताए।
प्रधानमन्त्रीको उद्घोष कार्यान्वयन गर्न कोष उत्साहका साथ लाग्ने प्रतिबद्धता पनि उनले व्यक्त गरे।
कार्यक्रममा एडप्ट एन एनिमल कार्यक्रम अन्तर्गत एउटा एकसिंगे गैंडाको एक वर्षको अभिभावकत्व प्रधानमन्त्री पत्नी राधिका शाक्यले पनि लिएकी थिइन्।
वन तथा वातावरणमन्त्री प्रेम आलेले एउटा हात्ती, नारायणी हस्पिट्यालिटी सर्भिसेस प्रालिले एउटा सारस, कन्टिनेन्टल ट्रेडिङका अदिती घिमिरेले एउटा रेड पान्डा, काष्ठमाण्डप इभेन्टका सुनिल भण्डारीले एउटा सारस, लक्ष्मी बैंकले एउटा लाटोकोसेरो, मेघा बैंकले एउटा डाँफे र १० वर्षका विभनसिंह बस्नेतले एउटा लभ बर्डको अभिभावकत्व लिए।
यसरी अभिभावकत्व लिने सबैले आफ्नो संरक्षणमा रहेका जनावर तथा पन्छीको वर्षभरीका पालनषोषण, औषधोपचार लगायत सम्पूर्ण खर्च व्यहोर्नुपर्नेछ।
यो पनि हेर्नुहोस्
प्रधानमन्त्री ओलीले गरे चिडियाखाना भ्रमण (तस्बिरहरू)