प्रधानमन्त्री केपी शर्मा ओलीले नेपाल कम्युनिष्ट पार्टीका महासचिव नेत्रविक्रम चन्द विप्लव र आफूबीच १० वर्ष पहिलेदेखि वार्ता भइरहेको बताएका छन्।
विप्लव समूह र सरकारबीच भएको सहमति पत्रमा हस्ताक्षर पछि शुक्रबार काठमाडौंमा सम्बोधन गर्दै ओलीले आफूहरू वर्षौदेखि सम्पर्कै रहेको बताए।
‘रातारात भनेको पढ्या थिएँ। वर्षौंदेखि वार्ता चलेको थियो। नगरा बजाएर वार्ता गरेनौँ। वार्ता नै गर्यौँ। यस विश्वासको थालनी ८/१० वर्ष भयो होला। हामीले घण्टौँ नै छलफल गरेका थियौँ। म प्रति उहाँको विश्वास त्यसै समयदेखि जागेको थियो सायद। तीवटा बुँदा काफी हो।’
उनले सम्बोधनकै क्रममा १८ पुराणमा व्यासले दुई वटा कुरा भनेको स्मरण गरे, ‘परोपकार पुण्याय । छलफल र वार्ताबाटै टुंग्याउछौँ। शान्तिपूर्ण बाटोबाट टुंग्याउनेछौं भन्नुभएको छ।’
उनले पृथकतावादी आन्दोलन गरिरहेका सिके राउतलाई राष्ट्रिय राजनीतिको मुलधारमा ल्याएको दाबी गर्दै उहाँहरू पनि आइसक्नु भएको भन्दै केही भाषा मिलाउनुपर्ने बताए।
‘मैले अंग्रेजले जसरी अंग्रेजी बोल्न सक्दिनँ। अंग्रेजले नेपालीले जस्तै नेपाली बोल्न सक्दैन। भाषा मिलाउनुपर्ने छ,’ ओलीले अंग्रेजको लबजमा नेपाली गीतसमेत गाएका थिए। ‘एउटा अंग्रेजले गीत गाथ्यो, ‘तिम्रो बाउ, मेरो बाउ माछा मार्न गयो’ गाउन त जान्यो नेपाली भाषा समात्न सकेन। त्यसैल भाषाहरू एकत्रित गर्न गाह्रो छ।’
