रूपन्देहीको मोतिपुरमा औद्योगिक कोरिडोरको शिलान्यास कार्यक्रमलाई स्थानीयले विरोध गर्दै शुक्रबार अर्थमन्त्री विष्णु पौडेललाई लक्षित गरेर ढुंगामुडा गरेका थिए।
केही स्थानीय र सुरक्षाकर्मी घाइतेसमेत भएका थिए। स्थानीयको अवरोधपछि मन्त्री पौडेल भाषण गर्दागर्दै बिचमै हिँडेका थिए।
यो घटनालाई प्रचण्ड–नेपाल नेतृत्वको नेकपा नेता तथा सोही क्षेत्रका सांसद घनश्याम भुसालले स्थानीयको विरोध प्रदर्शनमा आफ्नो पनि समर्थन रहेको बताएका छन्।
एक विज्ञप्ति जारी गर्दै भुसालले स्थानीयसँग सामान्य छलफल पनि नगरी सरकारका दुई-दुई जना मन्त्रीले जुन दमनपूर्ण हर्कत गरेका छन् त्यसले उनीहरुको जनविरोधी मुकुण्डो उदाङ्गो भएको बताएका छन्।
‘करिब साढे चार दशकदेखि बसोबास गर्दै आएका जनताको उचित व्यवस्थापनको विकल्प नदिईं, उनीहरुसँग सामान्य छलफल नगरी, वातावरणीय प्रभाव मुल्याइकनसमेत नभएको र केवल राजनीतिक प्रचारका लागि देखाइएको 'मोतिपुर औद्योगिक करिडोर' को तथाकथित शिलान्यास कार्यक्रमको विरोध गर्न पुगेका स्थानीय बासिन्दामाथि काम चलाउ सरकारका दुई-दुई जना मन्त्रीहरुले जुन दमनपूर्ण हर्कत गरेका छन्। त्यसले उनीहरुको जनविरोधी मुकुण्डो उदाङ्गो भएको छ’, विज्ञप्तिमा भनिएको छ।
वातावरणीय प्रभाव मुल्याङ्कन गरेपछि स्थानीय वासिन्दाको व्यवस्थापन गरेर मात्रै अरु काम अगाडि बढाउने विषयमा उद्योगमन्त्री, औद्योगिक व्यवस्थापन लिमिटेडका अधिकारीसँग भएको सहमतिसमेत तोडेर ढल्दै गरेको सरकारका मन्त्रीले सयौं सुरक्षकर्मीका घेराभित्र बसेर कायरतापूर्वक नागरिक दमनको नांगो नाच नाचेका उनले आरोप लगाएका छन्।
‘आफ्नो हक-अधिकारको रक्षाका लागि उभिएका स्थानीय निहत्था नागरिक, खासगरी युवा र महिलाहरुमाथि आज उनीहरुले जुन दमन गरेका छन्, अपमानित गरेका छन् र घाइते बनाएका छन् ती अपराधीहरुलाई जनताको परिक्षणमा खडा गरिनेछ’, उनले अगाडि भनेका छन्, ‘ज्ञातव्य के छ भने पहिलेका निर्वाचनमा त्यसै क्षेत्रबाट उम्मेदवार हुँदा मन्त्री विष्णु पौडेलले स्थानीय बासिन्दाको समस्या समाधान नभैकन कोरिडोरबारे कुनै काम शुरु भए मैले राजनीतिबाटै सन्यास लिनेछु' भनेर पटक-पटक बाचा गरेका थिए। आज तिनै विष्णु पौड़ेल तिनै नागरिकहरुमाथि लाठी बसाउन पुगेका छन्।’
त्यस क्षेत्रको जनप्रतिनिधिको हैसियतले मैले स्थानीय बासिन्दाको हकअधिकारको पक्षमा आवाज उठाउँदै र सम्बन्धित सरोरकारवालासFग छलफल गर्दै आएको छ। कायरहरुले कसै गरे पनि स्थानीय बासिन्दाको हक-अधिकार खोस्न नसक्ने उनले दाबी गरेका छन्।
औद्योगिक कोरिडोर बन्ने हल्ला चलाएर जग्गा दलालीको लागि वातावरण बनाउने बाहेक तचाथित शिलान्यासको कुनै अर्थ नभएको भन्दै उनले जनतालाई दु:ख दिएर अरु कुनै नाजायज फाइदा लिने उनीहरुको चाहानालई पूरा हुन दिइने बताएका छन्।
