नेकपा एमालेका सांसद लालबाबु पण्डितले सातौं अधिवेशनले एउटा पनि विधेयक पास गर्छ कि गर्दैन भनेर जनताले हेरिराखेको बताएका छन्।
प्रतिनिधि सभाको आजको बैठकमा बोलेका उनले भने, ‘यो सातौं अधिवेशनले एउटा पनि विधेयक पास गर्छ कि गर्दैन? नाम विधेयक अधिवेशन, एउटा पनि विधेयक पास गर्छ कि गर्दैन भनेर जनताले हेरिरहेका छन्।’
उनले संसदमा ६५ वटा विधेयक रहेको पनि बताए।
‘६५ वटा विधेयक प्रतिनिधि सभा र राष्ट्रिय सभामा रहेका छन्। कतिपय सन्धी तथा सम्झौता अनुमोदनका लागि पर्खिरहेको छ। दोस्रो अधिवेशनदेखि नागरिकता ऐन पर्खेर बसेको छ। नागरिकता पाउन मानिसहरू कुरिरहेका र आँशु झारिरहेका छन्,’ उनले भने।
उनले संघीय निजामती सेवा विधेयक लामो समयदेखि संसदमा रोकिएको पनि बताए। ‘विभिन्न समितिहरूको रिपोर्टसहित संसदमा विधेयक आएको छ। कतिपय गैरसरकारी विधेयक छन्,’ उनले भने।
उनले सरकारले संसदलाई विधेयक नदिएको भन्नेहरूलाई पनि जवाफ दिएका छन्। ‘कतिपय सदस्यले भनेका छन् संसदलाई सरकारले काम दिएन। सरकारले ल्याएका विधेयक काम होइनन्?,’ उनले प्रश्न गरे, ‘अनुमोदनका लागि ल्याएको काम होइन? के हो यो?’