काठमाडौं उपत्यकाभित्र पनि कोरोना संक्रमित दिनप्रतिदिन वृद्धि भइरहेका बेला उनीहरूलाई सहयोग गर्न नेपाली कांग्रेसका सांसदहरू छलफलमा जुटेका छन्।
पूर्वस्वास्थ्य मन्त्रीसमेत रहेका सांसद गगन थापालगायत ५ सांसदले बिहीबार चाक्सीवारीस्थित प्रकाशमान सिंहको घरमा छलफल गरेका हुन्।
कोरोनाको उच्च जोखिमका बेला आवश्यक सेवा के कसरी जनतामाझ पुर्याउन सकिन्छ भनेर आफूहरूले छलफल गरेको नेता सिंहले जानकारी दिए।
अर्का सांसद भीमसेनदास प्रधानले कोरोना रोकथाम तथा नियन्त्रण गर्न र समस्यामा परेका जनतालाई सहयोग गर्नेबारे जनप्रतिनिधिहरू छलफलमा जुटेको बताए।
‘अहिले पार्टीबाट निर्वाचित सांसद छलफलमा जुटेका हौं। अब वृहत रूपमा अन्य पार्टीबाट निर्वाचित उपत्यकाभित्रका जनप्रतिनिसँग पनि छलफल गरेर प्रधानमन्त्रीलगायतलाई भेट्ने र कोरोना नियन्त्रणबारे ध्यानाकर्षण गराउने तयारी छ,’ उनले सेतोपाटीसँग भने।
छलफलमा आज सिंह, प्रधान, थापा, दिव्यराज भण्डारी, राधेश्याम अधिकारी उपस्थित थिए।
‘कोरोनाबाट जनता समस्यामा छन्। हामीलाई शय्या, अक्सिजन मिलाइदिन फोनहरू आइरहेका छन्। सरकारले खासै सहयोग गरेको छैन,’ उनले भने, ‘जनतालाई सहयोग गर्न हामीले आफूले र पार्टीले सक्ने सहयोग गर्नेबारे आज छलफल गरिएको हो।’
आफूहरूसँग स्रोत साधन नभए पनि सबैको सहयोग लिएर कोरोना संक्रमितलाई सहयोग गर्न लागेको उनले बताए।
‘आवश्यक परेको खण्डमा सबै सांसद मिलेर अक्सिजनलगायत सामग्री जुटाउने, स्थानीय सरकारसँग समन्वय गरेर जनप्रतिनिधिका रूपमा काम गर्नेबारे छलफल गरेको हो,’ उनले भने।
