एमाले वरिष्ठ नेता माधव कुमार नेपालको सचिवालयले राष्ट्रिय सभा उपनिर्वाचनका सम्बन्धमा गृहमन्त्री रामबहादुर थापासँग कुनै सहमति नभएको स्पष्ट पारेको छ।
वरिष्ठ नेता नेपालको तर्फबाट उनका स्वकीय सचिव मोहन गौतमले प्रेस नोट जारी गर्दै मतदाताको स्वविवेक प्रयोग गर्ने कुरामा सहमति भएको विषयलाई बंगाइएको समेत बताएका छन्।
उनले सहमति भएको भनेर कुनै भ्रममा नपर्न समेत आग्रह गरेका छन्। 'आज कमरेड रामबहादुर थापा कोटेश्वर निवासमा आई पर्सि हुने राष्ट्रियसभा निर्वाचनमा सहयोग गर्न भनेकोमा पूर्व प्रधानमन्त्री एवम् वरिष्ठ नेता माधव कुमार नेपालले उम्मेद्वारी दर्ताको परिस्थितिमा अन्य दलहरू सहितलाई सहमत गराएर डा. खिमलाल देवकोटालाई आफ्नै पहलमा उम्मेद्वार बनाएकोले अहिले अन्यथा गर्न नसक्ने कुरा स्पष्ट पार्नुभयो।' गौतमले भनेका छन् 'त्यसपछि कमरेड थापाले नै त्यसो भए मतदाताहरूलाई स्वविवेक प्रयोग गर्न भनौं भन्ने प्रस्ताव गर्नुभएको हो। मतदाताले स्वविवेक प्रयोग गर्ने कुरामा सहमति छ र कतिपय स्थान एवम् मिडियामा प्रचार गरिएजस्तो अन्य कुनै सहमति भएको छैन।'
जेठ ६ गते वागमति प्रदेशका लागि हुने राष्ट्रिय सभाको उप निर्वाचनमा एमालेका तर्फबाट बादल उमेदवार बनेका छन्।
त्यस्तै विपक्षी गठबन्धन(कांग्रेस-माओवादी)ले खिमलाल देवकोटालाई उमेदवार बनाएका छन्। देवकोटलाई एमालेका वरिष्ठ नेता झलनाथ खनाल र माधव नेपाल समूहको समेत सहयोग छ।