कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल र एमाले नेता माधवकुमार नेपालबीच कोटेश्वरमा छलफल भएको छ।
तीन राजनीतिक पार्टीका शीर्ष नेताबीच समयसामयिक राजनीतिक घटनाक्रमबारे कुराकानी भएको हो।
स्रोतका अनुसार उनीहरूबीच पाँच वटा मुख्य विषयमा छलफल भएको थियो।
वर्तमान गठबन्धनमा एकले अर्कोलाई उपयोग गर्ने नभएर राष्ट्र, गणतन्त्र, संविधान र लोकतन्त्रको रक्षाका लागि भएको तीनै नेताको बुझाइ छ।
यस्तै, आपसी सम्बन्ध, एक आपसमा अविश्वास गराउने कुराबाट सजग रहने प्रतिवद्धता उनीहरूको छ।
यसैगरी, कोभिड महामारी र जनसरोकारका विषयमा सरकारको ध्यानाकर्षण, तत्काल सबैलाई पुग्नेगरी कोभिडविरूद्धको खोप तथा विपन्नलाई राहत प्याकेज कार्यक्रम ल्याउन उनीहरूले सरकारसँग माग गरेका छन्।
अदालतमा विचाराधीन मुद्दालाई प्रभावित पार्न सरकारले गरेका प्रयत्नबारे छलफल भएको स्रोतले बतायो।
अदालतको निष्पक्षताको विश्वास प्रभावित पार्ने काम नगर्न सरकारको ध्यानाकर्षण गराउने विषयमा छलफल भएको स्रोतले बतायो।
राज्यका कतिपय अंग र केही संवैधानिक निकायहरूमा भूमिकाको निष्पक्षता र निर्णय क्षमतामा आशंका, निष्पक्ष र समयमा निर्णय गर्न दुई नेताले ध्यानकर्षण गरेका छन्।
कोटेश्वरमा भएको छलफलका ७ विषय
१. समसामयिक राजनीतिक घटनाक्रमको समीक्षा
२. वर्तमान गठबन्धन एकले अर्कोलाई उपयोग गर्न होइन राष्ट्र, गणतन्त्र, संविधान र लोकतन्त्रको रक्षा एवम् जनताको सुविधा र हितलाई अभिवृद्धि गर्न बनेको हो’ भन्ने कुरामा पुनः स्पष्टता
३. आपसी सम्बन्धबारे छलफल, एक आपसमा अविश्वास उत्पन्न गराउने कुराबाट सजग रहने प्रतिबद्धता
४. कोभिड महामारी र जनसरोकारका विषयमा सरकारको ध्यानाकर्षण, तत्काल सबैलाई पुग्नेगरी कोभिड विरूद्धको खोप तथा विपन्नलाई राहत प्याकेज उपलब्ध गराउन माग
५. अदालतमा विचाराधीन मुद्दालाई प्रभावित गर्न सरकारले गरेका प्रयत्नबारे छलफल, अदालतको निष्पक्षतामा विश्वास, प्रभावित पार्ने काम नगर्न सरकारको ध्यानाकर्षण
६. राज्यका कतिपय अंग र केही संवैधानिक निकायहरूका भूमिकाको निष्पक्षता र निर्णय क्षमतामा आशंका, निष्पक्ष र समयमा निर्णय गर्न ध्यानाकर्षण
७ . पूर्व प्रधानमन्त्री झलनाथ खनालको स्वास्थ्य अवस्था बारे चासो, चिन्ता एवम् शीघ्र स्वास्थ्यलाभको कामना
