बिपी कोइराला स्वास्थ्य विज्ञान प्रतिष्ठानभित्र अनियमितता धेरै भएको भन्दै नागरिक तहबाटै दबाब सुरू भएपछि अख्तियार दुरूपयोग अनुसन्धान आयोगले छानबिन थालेको छ।
प्रतिष्ठानमा पदाधिकारीहरूकै मिलेमतोमा विभिन्न बहानामा अनियमितता हुने गरेको गुनासो धेरै छ। त्यही अनियमितताविरूद्ध धरानमा नागरिक दबाब सञ्जाल नै गठन गरेर आन्दोलन नै सुरू भएको छ।
दबाब अभियानलाई प्रतिष्ठानभित्रैका चिकित्सक, विद्यार्थी र कर्मचारीको पनि साथ छ। यसरी दबाब अभियान सुरू भएपछि गएको आइतबार प्रतिष्ठानमा अख्तियारले छापा मारेको थियो।
अख्तियारको इटहरी कार्यालयबाट निमित्त कार्यवाहक प्रमुख पुरूषोत्तम ढकाल नेतृत्वको टोलीले प्रतिष्ठानका विभिन्न विभागमा छापा मारेर पदाधिकारीहरूसँग सोधपुछ गर्दै कागजात नियन्त्रणमा लिएको थियो। यहीक्रममा अख्तियारले प्रतिष्ठानसँग थप कागजात मागेको छ।
प्रतिष्ठानलाई आवश्यक पर्ने विभिन्न सामान खरिदसँग सम्बद्ध थप कागजात मागिएको अख्तियारले पुष्टि गरेको छ।
आयोग इटहरीका प्रमुख नारायणप्रसाद रिसालका अनुसार प्रतिष्ठानको उजुरीबारे अनुसन्धान गर्न खरिदसम्बन्धीका आवश्यक सबै कागजपत्र मागिएको हो।
अख्तियारले बिपीमा भएको अनियमितताको बारेमा धेरै उजुरी आएपछि अनुसन्धान गर्ने टोली खटाएको जनाएको छ।
अनुसन्धान गर्ने टोलीबारेमा भने आयोगले कुनै विवरण बाहिर ल्याउने गरेको छैन।
स्रोतका अनुसार खरिदसम्बन्धी जफत भएका कागजपत्र सबै हेरेर प्रतिष्ठानका उपकुलपति डा ज्ञानेन्द्र गिरीलाई प्रतिक्रियाको लागि अर्को पत्र काट्ने तयारी छ।
प्रतिष्ठानमा भएको भ्रष्टाचारबारे प्रतिष्ठानकै डाक्टर, प्राध्यापक र विद्यार्थीले पनि आवाज उठाउँदै आएका छन्।
प्रतिष्ठानको अनियमितताबारे अख्तियारको ध्यानाकर्षण गराउँदा फ्याकल्टी वेल्फेयर सोसाइटीका अध्यक्ष डा.विष्णु पोख्रेललाई उपकुलपतिले स्पष्टीकरण सोधेपछि त्यसको विरोधमा प्रदर्शन भइरहेको छ ।
उपकुलपति कार्यालयअघि भेला भएका चिकित्सक तथा विद्यार्थीहरूले बुधबार पनि प्रदर्शन गरेका थिए।
