जनता समाजवदी पार्टी (जसपा) अध्यक्ष महन्थ ठाकुरले आफूलाई २०७७ पुस ७ गतेको कार्यकारिणी समितीको बैठकले प्रथम अध्यक्षको जिम्मेवारी दिएको दाबी गरे पनि बैठकपछि जारी विज्ञप्तिमा त्यस्तो केही पाइएको छैन।
जसपा अध्यक्ष उपेन्द्र यादव पक्षले उपलब्ध गराएको विज्ञप्तिमा दुवै अध्यक्षको हस्ताक्षर रहेको छ। त्यो विज्ञप्तिमा प्रधानमन्त्री केपी ओलीले गरेको प्रतिनिधि सभा विघटनको विषयमा मात्रै बैठकमा छलफल भएको र निर्णय भएको उल्लेख छ।
पुस ७ कै कार्यकारिणी समितीको बैठकले प्रधानमन्त्री ओलीको कदमलाई देशव्यापी रूपमा विरोध गर्ने भनेर निर्णय गरेको थियो। त्यही निर्णयका आधारमा पुस २५ गतेदेखि माघ ७ गतेसम्म जसपाले देशब्यापी विरोधका विभिन्न कार्यक्रमसमेत गरेको थियो।
हेर्नुहोस् विज्ञप्ति
तर आन्दोलनका कार्यक्रम भइरहेकै समयमा ठाकुर भने प्रधानमन्त्री ओलीसँग नजिक हुँदै गएका थिए। उनले सार्वजनिक रूपमा ओलीको आलोचना गर्दा समेत निकै तौलिएर बोल्ने गरेका थिए। अर्कोतिर यादव भने ओलीविरूद्ध निकै आक्रामक बनेका थिए।
पुस ७ कै बैठकले ओलीको कदमलाई राजा महेन्द्रले २०१७ पुस १ गते चालेको कदमसँग तुलना गरेको थियो।
ठाकुरले भने यही बैठकले आफूलाई प्रथम अध्यक्षको हैसियतले कार्यकारिणी सदस्यको हेरफेर गर्ने अधिकार दिएको दावी गरेका छन्। ठाकुरले निर्वाचन आयोगमा बुझाएको पत्रमा आफ्नो मात्रै हस्ताक्षर भएको पत्र बुझाएका छन्। जबकि, विज्ञप्तिमा दुवै अध्यक्षको हस्ताक्षर छ।
जसपा विवाद उत्कर्षमा पुगेकै बेला ठाकुरले पुस ७ को बैठकले दिएको अधिकार प्रयोग गरेको भन्दै कार्यकारिणी समितीमा यादव पक्षीय नेता हटाएर आफू पक्षीय नेतालाई थपेका छन्। उनले यादव पक्षीय २० जना नेतालाई हटाएका छन्।