क्रियाशील सदस्यताबारे देखिएका विवादित बाँकी काम शीर्ष नेतृत्वले टुंग्याउने गरी नेपाली कांग्रेसको केन्द्रीय क्रियाशील छानबिन समितिले प्रतिवेदन बुझाएको छ।
केही त्रुटि र समितिभित्रै असमझदारी देखिएपछि बुधबार सभापति शेरबहादुर देउवाले प्रतिवेदन परिस्कृत गरि बुझाउन २४ घन्टाको समय दिएका थिए।
परिस्कृत प्रतिवेदन आज बूढानिलकण्ठमा बसेको पदाधिकारी बैठकमा क्रियाशील छानबिन समितिले बुझाएको हो।
यो पनि: कांग्रेसले बनायो ८ लाख ५२ हजार क्रियाशील सदस्य, कुन प्रदेशमा कति?
छानबिन समितिका सदस्यसमेत रहेका प्रवक्ता प्रदीप पौडेलका अनुसार छ हजार सात सय ४३ मध्ये एक सय वडामा क्रियाशीलबारे अझै विवाद देखिएका छन्। यी विवाद हल गर्ने जिम्मा अब शीर्ष नेतृत्वलाई छाडेको उनले बताए।
‘क्रियाशील छानबिनबारेको प्रतिवेदनमा केही सामान्य त्रुटि देखिएका थिए। सच्याएर आज बुझाइएको छ। अब क्रियाशील छानबिन समितिले आफ्नो काम सिध्यायो,’ उनले भने, ‘बाँकी विवाद शीर्ष नेतृत्वबाट हल हुन्छ।’
उनकाअनुसार सप्तरी र बारा जिल्लाका नयाँ क्रियाशीलबारे शीर्ष नेतृत्वले समाधान खोज्नुपर्नेछ। यस्तै रसुवा र सिन्धुपाल्चोकलगायत जिल्लाका केही क्षेत्रमा देखिएका विवाद हल गर्ने जिम्मेवारी पनि शीर्ष नेतालाई नै दिइएको छ।
विवादित एक सय वडामा अहिले नयाँ क्रियाशीलको विषय स्थगित गरिएका छन्। यी क्षेत्रमा पुराना क्रियाशील भने नवीकरण गरिएको छ। विवादित क्षेत्रमा १३ औं महाधिवेशनकै क्रियाशीलबाट वडा अधिवेशन गर्न सक्ने विकल्प पनि अगाडि सारिएको छ।
‘अब क्रियाशीलको विवाद देखाएर महाधिवेशन रोकिने अवस्था छैन,’ पौडेलले भने, ‘चार प्रतिशत वडामा मात्रै विवाद छ। १३ औं महाधिवेशनमा पनि ३३ क्षेत्रमा विवाद थियो। त्यसभन्दा पहिले पनि विवाद थियो।’
अब साउन अन्तिम सातातिर वडा अधिवेशन र पूर्वनिर्धारित समय भदौ १६ देखि १९ मै महाधिवेशन गर्नुपर्ने उनले बताए।
