नेपाली कांग्रेसका केन्द्रीय सदस्य शेखर कोइरालाले गुन्दागर्दी गर्नेहरू पराजित हुने बताएका छन्।
पार्टी कब्जा गर्ने हिसावले जिल्ला-जिल्लामा नेताहरूले गुन्दागर्दी गरिरहेको पनि उनको दाबी थियो।
‘पार्टी कब्जा गर्ने हिसावले जिल्ला-जिल्लामा नेताहरूले गुन्दागर्दी देखाइरहनु भएको छ, यो पार्टीलाई कदापी स्वीकार्य हुँदैन,’ उनले पार्टी केन्द्रीय कार्यालय सानेपामा आज सर्लाही कांग्रेसले गरेको धर्नामा ऐक्यवद्धता जनाउँदै भने।
उनले गुन्दागर्दी गर्नेहरू परास्त हुने पनि बताए।
‘गुन्दागर्दी गर्ने यस्ता तत्वहरू जिल्ला-जिल्लामा परास्त हुन्छन् भन्नेमा म विश्वस्त छु। शान्तिपूर्ण आन्दोलन गर्नुस्,’ कोइरालाले भने, ‘संयमित ढंगले गरिने आन्दोलनमा हाम्रो समर्थन छ।’
सर्लाही निर्वाचन क्षेत्र नम्बर ४ मा कांग्रेस क्रियाशील सदस्यतामा विवाद छ। विधि विधानभन्दा बाहिरबाट करिब पाँच सय जनालाई क्रियाशील सदस्यता दिइएको भन्दै केन्द्रीय सदस्य अमरेशकुमार सिंहलगायत नेता/कार्यकर्ता आन्दोलनमा छन्।
यसैबीच गत मंगलबार पार्टी कार्यालय सानेपामै प्रदेश नम्बर २ का महिला, बालबालिका, खेलकुद तथा युवा मन्त्री वीरेन्द्रप्रसाद सिंहले सर्लाही बरहथवा नगरपालिका ४ का वडाध्यक्ष लखेन्द्र महतोमाथि हातपात गरेपछि वरिष्ठ नेता रामचन्द्र पौडेल पक्षले गुन्दागर्दी प्रवृत्ति देखिएको भन्दै विरोध गरिरहेका छन्।
कोइराला र पूर्वमहामन्त्री प्रकाशमान सिंह आज सानेपा पुगेर धर्नामा ऐक्यवद्धता जनाएका थिए। कोइरालाले प्रहरी प्रशासनको बलमा सभापति शेरबहादुर देउवाको गृहजिल्ला डडेल्धुरामा वडा अधिवेशन भएको पनि बताए।
‘डडेल्धुरामा प्रहरी प्रशासन लगाएर अधिवेशन गरिएको छ। ७५ वर्ष लामो पार्टी इतिहासमा कहिल्यै पनि यस्तो भएको थिएन,’ उनले भने।
केन्द्रीय सदस्य अमरेशकुमार सिंहले सर्लाहीमा क्रियाशील सदस्यतामा देखा परेका विवाद हल गर्न सभापति देउवासमक्ष राजीनामा नै दिएका थिए। तैपनि उक्त विवाद समाधान हुन सकेको छैन।
पौडेल पक्षका नेताहरू सानेपा पुगेपछि प्रदेश नम्बर २ का मन्त्री सिंहलगायतको टिम पनि सानेपा जाने तयारी गरेको छ।