प्रदेश २ सरकारले अविरल वर्षा तथा हावाहुरीले बालीनालीमा भएको क्षतिबारे तथ्यांक संकलन कार्य सुरू गरेको छ।
भूमि व्यवस्था कृषि तथा सहरकारी मन्त्रालयअन्तर्गत रहेका प्रदेशका आठ वटै जिल्लाका कृषि ज्ञानकेन्द्र र भेटेनरी कार्यालयलाई तीन दिनभित्र तथ्यांक संकलनको म्याद दिइएको मन्त्रालयले जनाएको छ।
भूमि व्यवस्था कृषि तथा सहकारी मन्त्री विजय कुमार यादवले अविरल वर्षासँगै आएको हावाहुरीले बालीनालीमा परेको नकारात्मक प्रभावप्रति गम्भीर ध्यानाकर्षण भएको बताए।
तथ्यांक आइसकेपछि स्थानीय तथा संघ सरकारको समन्वयमा प्रदेश सरकारले राहत प्याकेज घोषणा गर्ने उनको भनाइ छ।
‘किसानको मेहनत र लगानी खेर जाने हो कि डर आउनु स्वभाविक हो। हालसम्म कटानी भएको धानको पाजा र पसही खेतमै डुबेको, हावाको वेगको कारण धान ढलेको सूचना प्राप्त भएको छ। पशुपन्छीतर्फ भएको क्षतिबारे सूचना आउन बाँकी छ,’ मन्त्री यादवले भने,‘संघीय कृषि मन्त्रीसँग पनि कुरा भएको छ। प्रदेश तथा स्थानीय सरकारसँग समन्वय गरी क्षतिपूर्तिको प्याकेज दिने हामी प्रयास गर्दैछौं।’
मन्त्रालयका अनुसार कात्तिक १ र २ गते भएको अविरल वर्षा तथा हावाहुरीले प्रदेशका आठ वटै जिल्लामा खेतमा काट्ने अवस्थामा रहेको र काटिसकेको धानबालीमा व्यापक क्षति भएको छ।
‘आठ वटै जिल्लामा बराबरै वर्षा भएको छ। डाटा आइसकेपछि मात्र के कति क्षति भएको यकिन हुन्छ,’ मन्त्री यादवले भने।
मन्त्रालयका सूचना अधिकारी मनिष पालका अनुसार यसवर्ष प्रदेशमा ४ लाख ३ हजार हेक्टर क्षेत्रफलमा धान खेती गरिएको थियो। समयमा वर्षा भएका कारण यसपालि धान राम्रो सप्रिएको थियो।