नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल 'प्रचण्ड'ले मुलुक अहिले अप्ठ्यारो परिस्थितिबाट गुज्रिएको र आफूहरू राजनीतिक स्थायित्व र विकासमार्फत् मुलुकलाई अप्ठ्यारो अवस्थाबाट निकास दिन केन्द्रित भएर लागेको बताएका छन्।
माओवादी केन्द्रका रूपन्देही इञ्चार्ज स्वर्गीय रामप्रसाद बञ्जाडेको स्मृतिमा मंगलबार बुटवलमा आयोजित शोकसभामा बोल्दै अध्यक्ष प्रचण्डले मुलुकमा राजनीतिक स्थायित्व, विकास र समृद्धिले मात्रै हजारौं सहिदहरूको सम्मान हुने बताए।
‘अहिले मुलुक निकै अप्ठ्यारो परिस्थितिबाट गुज्रिरहेको छ, हामी देशलाई नयाँ राजनीतिक स्थायित्व र विकासतिर लैजाने जमर्काेमा छौं,’ अध्यक्ष प्रचण्डले भने।
उनले सबै राजनीतिक दलहरू नयाँ नेतृत्व चयनमा लागिरहेको र यसले निर्वाचनको माहोल पनि बनिरहेको बताए।
‘अहिले सबै राजनितिक दलहरूका महाधिवेशन र अधिवेशन भइरहेकोले निर्वाचनको माहोल बनिरहेको छ, लोकतन्त्रका लागि चुनाव महत्वपूर्ण छ, तर निर्वाचन स्वस्थ, धाँधलीरहित, जनताको पहुँचमा हुनुपर्छ भन्नेतर्फ सबैको ध्यान जानुपर्छ,’ उनले भने।
अध्यक्ष प्रचण्डले समाजवादतर्फको यात्राले मात्र मुलुकको समृद्धि र स्थायित्व हुने भन्दै त्यसको लागि सहकार्य र समझदारी आवश्यक रहेको बताए।
अध्यक्ष प्रचण्डले स्वर्गीय बञ्जाडेको कार्यसम्पादन क्षमता अब्बल रहेको स्मरण गर्दै २/३ महिना अगाडिमात्रै बञ्जाडेले आफूले केन्द्रमा जिम्मेवारी नपाउनुको कारण सोधेपछि मात्र आफू गम्भीर भएको र जिल्लाको ईन्चार्जको जिम्मेवारी दिएको बताए।
आफूले पार्टिभित्र र परिवारमा पनि यस्ता घटना धेरै बेहोरेकै स्मरण गर्दै स्वर्गीय बञ्जाडेको निधनले पार्टिभित्र अपूरणीय क्षति भएको बताए।
त्यसैगरी, पार्टीका लुम्बिनी प्रदेश इञ्चार्ज चक्रपाणि खनाल बलदेवले बञ्जाडेलाई धेरै युद्धमा बचाए पनि दुर्घटनाबाट बचाउन नसकिएको बताए।
कार्यक्रममा बोल्ने विभिन्न राजनितिक दलका प्रतिनिधिहरूले माओवादी आन्दोलनका जीवित इतिहासको रूपमा बञ्जाडेको निधनले एउटा कुशल राजनीतिज्ञको अभाव खड्किरहने बताएका थिए।