मधेश प्रदेशका मुख्यमन्त्री लालबाबु राउतले प्रदेशको नाम मधेश कायम भएसँगै मधेसी जनताको एउटा ठूलो सपना पूरा भएको बताएका छन्।
प्रदेशसभाको सोमबारको बैठकबाट प्रदेशको नाम र राजधानी टुङ्गयाएपछि पत्रकारहरूसँग कुराकानी गर्दै मुख्यमन्त्री राउतले मधेस प्रदेश नाम राख्ने प्रस्ताव दुई तिहाइभन्दा बढी मतले पारित भएसँगै मधेशी जनताको ठूलो सपना पूरा भएको बताए।
‘मधेस प्रदेशको नामकरणले मधेस आन्दोलनले सम्मान पाएको छ। मधेश आन्दोलनको भावना र मधेशी जनताको चाहनाअनुरूप मधेश प्रदेश कायम भएको छ, यो हामी सबैको गौरवको कुरा हो,’ उनले भने।
यसबाट शहीदहरुको सम्मान भएको उनको भनाइ थियो। मधेस प्रदेशको घोषणाले पहिचानको प्रतिनिधित्व गर्ने बताउँँदै उनले यसबाट उत्पीडित वर्ग, समुदायको मुक्तिका लागि अघि बढ्न ऊर्जा प्राप्त हुने विश्वास व्यक्त गरेका थिए।
मधेश प्रदेश स्थापनाका लागि सहयोग पुर्याउने सबै प्रदेशसभा सदस्य, प्रदेशसभा सचिवालयका कर्मचारी लगायतलाई धन्यवाद ज्ञापन दिँदै मुख्यमन्त्री राउतले सम्पूर्ण प्रदेशबासी, देशबासीमा बधाई तथा शुभकामना समेत व्यक्त गरेका थिए।
प्रदेश सरकार गठन भएको चार वर्षपछि सोमबार नाम मधेस र राजधानी जनकपुरधाम प्रदेशसभाबाट पारित भएको थियो।
