केएमसी र नोबेललगायत मेडिकल कलेजमा चलिरहेको विद्यार्थी आन्दोलनमा नागरिक समाज, अभिभावकलगायतको ऐक्यवद्धताको लागि विद्यार्थी संगठनले अपिल गरेका छन्।
मंगलबार विज्ञप्ति जारी गर्दै संयुक्त विद्यार्थी संगठनले देशभरका मेडिकल विद्यार्थी, अभिभावक, पत्रकार नागरिक समाजलगायतलाई आन्दोलनमा सहभागि हुन र ऐक्यबद्धता जनाउन आग्रह गरेका हुन्।
विज्ञप्ति निकाल्नेमा नेविसंघ अध्यक्ष राजिव ढुंगाना, अखिल (क्रान्तिकारी) अध्यक्ष पञ्चा सिंह, अनेरास्ववियु अध्यक्ष सुदेश पराजुली, समाजवादी विद्यार्थी युनियनका अध्यक्ष रूपनारायण श्रेष्ठ, मोहन वैद्य निकट अखिल (क्रान्तिकारी)का हरिकृष्ण गजुरेल, विप्लव निकट अखिल क्रान्तिकारी अध्यक्ष प्रकाश शाही, अखिल छैठौंका देवेन्द्र कुँवर र अखिल नेपाल बिद्यार्थी युनियनका अध्यक्ष मनिष भट्टराई छन्।
उनीहरूले कलेज प्रशासनको दुर्ब्यवहार र दमनको निन्दा गर्दै घाइते विद्यार्थीको स्वास्थ्यलाभको कामना गरेका छन्।
काठमाडौं मेडिकल कलेज र नोबेल मेडिकल कलेजमा अतिरिक्त शुल्क बिरूद्ध चलेको आन्दोलनमा विद्यार्थी र कलेज प्रशासनबीच समझदारी कायम हुन नसक्दा आन्दोलन थप चर्किएको हो।
संयुक्त विद्यार्थी संगठनले मागपत्र टाँसेर केएमसी प्रशासनमा दुई दिन अघि तालासमेत लगाएका छन्।
माग पुरा गर्ने तर्फ उदासिनता देखिएको भन्दै सोमबार विद्यार्थीले नोबेल प्रशासन बिरूद्ध गरेको सिट्टी जुलुसमा कलेज प्रशासनको हस्तक्षेप हुँदा १ दर्जन बढी विद्यार्थी घाइते भएका छन्।
शान्तिपूर्ण कार्यक्रममा दमन गरेकोमा आक्रोस पोख्दै विद्यार्थी संगठनले समस्या समाधानमा पहल नगरे थप कडा संघर्षमा उत्रने चेतावनी दिएका छन्।