रूपन्देहीको मायादेवी गाउँपालिकाका ध्रुवनारायण चौधरी एक मात्रै व्यक्ति हुन् जसले जिल्लामा दोहोरिएर पालिका प्रमुख हुने अवसर पाएका छन्।
यसअघि २०७४ सालको स्थानीय तहको निर्वाचनमा नेपाली कांग्रेसबाटै गाउँपालिका अध्यक्ष निर्वाचित भएका चौधरी यसपटक पनि सोही गाउँपालिकाबाट कांग्रेसबाटै अध्यक्षका उम्मेदवार बनेका थिए।
चौधरीसँगै रूपन्देहीका १६ वटा स्थानीय तहबाट ११ जना पालिका प्रमुखहरूले यसपटक पनि सोही पदमा उम्मेदवारी दिएका थिए। तर यसअघिका दस जना पालिका प्रमुखले निर्वाचनमा पराजय भोगे। चौधरी भने एक जना मात्रै दोश्रो पटकका लागि सोही पदमा निर्वाचित भएका हुन्।
चौधरीले लोकतान्त्रिक समाजवादी पार्टीका रामअधारे अहिरलाई पराजित गर्दै पुनः अध्यक्षमा निर्वाचित भएका हुन्। चौधरीले ५ हजार ३ सय ८६ मत ल्याउँदा अहिरले ४ हजार ९ सय ८८ मत पाएका छन्।
पार्टीभित्र मात्र होइन विपक्षीहरूसँग समेत नरम व्यवहार गर्ने र मिजासिलो स्वभावका भनेर चिनिन्छन् चौधरी।
'पहिलो कार्यकालमा गाउँपालिकामा धेरै सुधारका काम गरेकाले मतदाताले यसपटक पनि मलाई नै अनुमोदित गरिदिए,' उनले भने।
रूपन्देहीमा कतिपय पालिका प्रमुखहरूले यसपटक पार्टी परिवर्तन गरेरसमेत सोही पदमा उम्मेदवारी दिएका थिए। तत्कालीन मधेसी जनअधिकार फोरम लोकतान्त्रिकबाट सम्मरीमाई गाउँपालिकाको अध्यक्ष जितेका जितेन्द्रनाथ शुक्ला माओवादी केन्द्र प्रवेश गरी अध्यक्षका उम्मेदवार बनेका थिए। अघिल्लो निर्वाचनपछि फोरम नेपाली कांग्रेसमा समाहित भएपछि एमाले प्रवेश गरेका शुक्ला एमालेबाट उम्मेदवार बन्ने नदेखेपछि निर्वाचनको एक महिना पहिले मात्रै माओवादी प्रवेश गरेका थिए।
तत्कालीन संघीय समाजवादी फोरम नेपाल हाल जनता समाजवादी पार्टीबाट मर्चवारी गाउँपालिका अध्यक्ष निर्वाचित भएका केशवनन्द बनियाले निर्वाचनको मुखमा जनता समाजवादी पार्टी (जसपा) छोडेर लोकतान्त्रिक समाजवादी पार्टी (लोसपा) बाट उम्मेदवारी दिएका थिए।
त्यस्तै २०७४ सालको निर्वाचनमा जसपाबाट रोहिणी गाउँपालिकाको अध्यक्षमा निर्वाचित भएका सनोजकुमार यादव पनि एमाले प्रवेश गरी पुनः अध्यक्षको उम्मेदवार बनेका थिए। उनी पराजित भएका छन्।
अघिल्लो निर्वाचनमा लुम्बिनी साँस्कृतिक नगरपालिकाको प्रमुखमा निर्वाचित भएका मनमोहन चौधरी यसपटक उम्मेदवार बने पनि पराजित भए। अघिल्लो निर्वाचनमा स्वतन्त्रबाट उठेर निर्वाचन जितेका चौधरीले बीचमा जसपा र निर्वाचनको मुखमा लोसपा प्रवेश गरेका थिए।
अघिल्लो निर्वाचनमा निर्वाचित भएको र यसपटक पनि सोही पार्टीबाट उम्मेदवार बनेका सैनामैना नगरपालिकाका चित्र बहादुर कार्की, देवदह नगरपालिकाका हिरा बहादुर केसी, सियारी गाउँपालिकाका अयोध्याप्रसाद चौधरी र शुद्धोधन गाउँपालिकाका किशुनचन्द्र चौधरी पनि यसपटक पराजित भएका छन्।
देवदहका हिराबहादुर केसी नेपाली कांग्रेसबाट र अन्य तीन जना एमालेबाट उम्मेदवार बनेका थिए।
त्यस्तै जसपाबाट निर्वाचित गैंडहवा गाउँपालिका बच्चुलाल केवट र कोटहीमाई गाउँपालिकाका चन्द्रभूषण यादव पनि दोश्रो पटकका लागि पराजित भएका छन्।
उपप्रमुखमा भने दोहोर्याएर निर्वाचित हुने चार जना छन्।
तिलोत्तमा नगरपालिकाकी उपप्रमुख जगेश्वरी चौधरी, सैनामैनाकी बिना राना, देवदहकी विद्यालक्ष्मी गुरुङ, शद्धोधनकी शान्तिदेवी ज्ञवाली पुनः सोही पदमा निर्वाचित भएका हुन्।
अघिल्लो निर्वाचनमा एमालेबाट सियारी गाउँपालिकाको उपाध्यक्ष निर्वाचित भएकी अमृता गुरुङ भने यसपटक पराजित भएकी छन्।