नेपाली कांग्रेसका नेता शेखर कोइरालाले पहिले पार्टीका विभिन्न तहमा रहेर काम गरेका नेताहरूसँग कुराकानी गरेका छन्।
कोइरालाले पार्टीको आन्तरिक विषयहरू र समसामयिक राजनीतिक घटनाक्रमबारे आइतबार नेताहरूसँग कुराकानी गरेका छन्।
केन्द्रीय सदस्य बलबहादुर केसी, तारानाथ रानाभाट, चिरञ्जीवि वाग्ले, ओमकार श्रेष्ठ, विनयध्वज चन्द र विपिन कोइरालासँग शेखरले छलफल गरेको उनको सचिवालयले जानकारी दिएको छ। यीमध्ये विपिन नेविसंघका संस्थापक सभापति हुन्।
शेखरले पार्टी कमजोर रहेको भन्दै सुधार गरेर जानका लागि सल्लाह तथा सुझाव दिन आग्रह गरेका थिए।
‘तपाईंहरूले पार्टीका लागि धेरै योगदान गर्नुभएको छ। लामो अनुभव पनि छ। पार्टी अहिले कमजोर अवस्थामा पुग्यो। देशभरका साथीहरू निराश देखिन्छन्,’ कोइरालाले भने, ‘अनुभवका आधारमा सल्लाह र सुझाव दिनुपर्यो।’
उनीहरूले छलफलका क्रममा कोइरालालाई थप जिम्मेवार हुँदै समन्वयकारी भूमिका खेलेर पार्टीलाई अघि बढाउन सुझाव दिएका थिए।
कांग्रेस पहिलेजस्तो सैद्धान्तिक र सांगठानिक रूपमा बलियो अहिले नरहेको पनि उनीहरूले बताएका थिए।
‘पार्टीभित्र आदर्श, इमान, त्याग र निष्ठाको राजनीति रहेन। पार्टी ठेकेदारी प्रथामा चल्न थाल्यो। पुराना नेताहरूलाई पाखा लगाएर उनीहरुको योगदानको अवमूल्यन गर्न खोजिएको छ,’ उनीहरूले भनेका थिए।
साथै सत्ता गठबन्धन र चुनावी तालमेलबारे पनि गहिरोसँग समीक्षा गर्न उनीहरूको माग थियो। ‘गठबन्धनको पुनमूल्यांकन गरिनुपर्दछ। होइन भने संघीय र प्रदेशको चुनावपछि कांग्रेसलाई असजिलो पर्न पनि सक्छ,’ उनीहरूले कोइरालालाई भनेका थिए।
साथै पार्टीभित्रका हरेक अवसरमा न्यायोचित व्यवस्थापन हुनुपर्ने उनीहरूको भनाइ थियो। गत मंसिरमा १४ औं महाधिवेशनमा सभापति पदमा शेरबहादुर देउवासँग कोइराला पराजित भएका थिए। कोइराला कांग्रेस केन्द्रीय सदस्य स्वत छन्।
सभापति देउवाले विधानअनुसार काम नगरेको र एकलौटी निर्णय गरिरहेकोमा कोइराला पक्ष असन्तुष्ट छ। शेखरले केही समयदेखि आफूनिकट नेता र पार्टीका पुराना नेताहरूसँग छलफल जारी राखेका छन्।