आइतबार बसेको नेकपाकालीन सचिवालयका नेताहरूको बैठकमा राष्ट्रियसभाका सांसद वामदेव गौतमले पार्टी एकताको प्रस्ताव गरेका थिए।
हात्तीवनस्थित एक अपार्टमेन्टमा भएको बैठकमा नेकपा माओवादी अध्यक्ष पुष्पकमल दाहाल 'प्रचण्ड', माओवादी केन्द्रका नेता नारायणकाजी श्रेष्ठ, नेकपा एकीकृत समाजवादीका अध्यक्ष माधव नेपाल, नेकपा एसका सम्मानित नेता झलनाथ खनाल र गौतम सहभागी थिए। गौतम अहिले नेकपा एकता अभियानमा सक्रिय छन्। उनकै पहलमा हात्तीवनको भेटघाट भएको थियो।
बैठकमा गौतमले एमाले अध्यक्ष केपी ओलीसँग आफूले गरेको संघर्ष र पाएको धोकाबारे समेत बताएका थिए। बैठकको अन्त्यमा गौतमले चुनावमा तालमेलमात्रै होइन पार्टी एकता गर्नुपर्ने प्रस्ताव राखेका थिए। जवाफमा अरू नेताहरूले यसलाई आफूहरूले सकारात्मक रूपमा लिएको बताएका थिए।
बैठकपछि नेकपा एसका सम्मानित नेता झलनाथ खनालले आफूहरूको बीचमा असहमति नभए पनि पार्टी एकताका लागि समीक्षा गर्नुपर्ने विषय धेरै भएको तर्क गरेका थिए।
उनले सबै वामपन्थीहरूको एकता हुनुपर्ने भनेर आफूले बारम्बार भनेको समेत सेतोपाटीलाई बताएका थिए।
सोमबार बसेको नेकपा एसको सचिवालय बैठकमा पनि ५ नेताको भेटबारे छलफल भएको एसका प्रवक्ता जनगन्नाथ खतिवडाले सेतोपाटीलाई बताए।
'हामीले आइतबारको भेटबारे सामान्य छलफल गर्यौं। तर माओवादी केन्द्रसँगको एकताबारे कुनै कुरा भएको छैन। यस विषयमा अहिलेसम्म कुनै औपचारिक प्रवेश पनि भएको छैन,'उनले भने,'माओवादी केन्द्रले हामीलाई निर्वाचनमा दिएको धोका तलसम्मका साथीहरूले देखेका छन्। माओवादी अध्यक्ष पुष्पकमल दाहाल 'प्रचण्ड'ले पेश गरेको डकुमेन्टमा समेत हामीलाई होच्याउने काम भएको छ।'
प्रचण्डको भनाइलाई आधार मान्ने हो भने त दुई पार्टीको एकताको हैसियत पनि उतैबाट तय हुने खतिवडाले बताए।
यद्यपि एकता असम्भव नभए पनि यसबारे कुनै कुराकानी भने नभएको उनले बताए।
नेकपा एसभित्र माओवादी केन्द्रसँग भन्दा पनि एमालेसँग एकता या गठबन्धन गर्नुपर्ने मत पनि उत्तिकै छ।
आफूहरूको शक्तिलाई माओवादी केन्द्रले भन्दा एमालेले चिनेको नेकपा एसका नेताहरूको बुझाइ छ। यद्यपि एमालेले यो कुरा भन्न नचाहेको समेत उनीहरूको तर्क छ।
नेकपा एसका उपमहासचिव गंगालाल तुलाधरले दीर्घकालमा एमाले र माओवादी दुवैसँग एकता हुनसक्ने भए पनि तत्काल आफूले सम्भावना नदेखेको बताए।
'हामी दीर्घकालमा त एक नभई उपाय नै छैन,' उनले भने,'अहिले नै दुवै पार्टीसँग एकता सम्भव छैन। एकता हुनैपर्दा भने माओवादीसँगको सम्भावना धेरै छ।'