नेपाली कांग्रेसले केही भ्रातृ तथा शुभेच्छुक संस्थालाई मान्यता दिन लागेको छ।
१३ औं महाधिवेशनपछि भ्रातृ र शुभेच्छुक संघसंस्थाको मान्यता पाउँ भन्दै केही संघसंस्थाबाट निवेदन परेको थियो।
त्यसबेला केन्द्रीय सदस्य एनपी साउद नेतृत्वमा कांग्रेसले समिति नै बनाएर भ्रातृ तथा शुभेच्छुक संघसंस्थाबारे अध्ययन गरेको थियो।
सोमबारदेखि सुरू केन्द्रीय कार्यसमिति बैठकमा नयाँ भ्रातृ तथा शुभेच्छुक संघसंस्थालाई मान्यता दिनेबारे छलफल भइरहेको छ।
कांग्रेस पदाधिकारी बैठकले नयाँ थप हुने भ्रातृ तथा शुभेच्छुक संघसंस्थाका विधानबारे यसअघि नै अध्ययन पनि गरिसकेको छ।
कांग्रेसले मुख्यगरी दुई भ्रातृ संस्था थप गर्न लागेको छ- नेपाल थारू संघ र नेपाल आदिवासी जनजाती महासंघ। यी भ्रातृ संस्थाअन्तर्गत रहेर शुभेच्छुक संस्था पनि थप गर्ने गृहकार्यमा कांग्रेस जुटेको छ।
कांग्रेस प्रवक्ता प्रकाशशरण महतका अनुसार केही संघसंस्थाले भ्रातृ तथा शुभेच्छुक आवद्धताका लागि माग गरिरहेका छन्।
‘कतिपय संघसंस्थाले भ्रातृ तथा शुभेच्छुक आवद्धताका लागि पार्टीमा केही समयअघि निवेदन दिनुभएको थियो,’ महतले भने, ‘यसबारे पदाधिकारी बैठकमा छलफल गरियो। एनपी साउदको नेतृत्वमा बनेको समितिको सुझाव र सिफारिका आधारमा यो विषय पनि केन्द्रीय समितिमा छलफलका लागि पेश गरिएको छ।’
कांग्रेसले शुभेच्छुक संघसंस्थातर्फ नेपाल लोकतान्त्रिक खेलकूद संघ, नेपाल लोकतान्त्रिक निर्माण व्यवसायी संघ, नेपाल लोकतान्त्रिक राष्ट्रिय यातायात व्यवसायी संघ, नेपाल लोकतान्त्रिक उद्योग व्यापार व्यवसायी संघ, नेपाल लोकतान्त्रिक पर्यटन व्यवसायी संघ, नेपाल लोकतान्त्रिक संस्थागत तथा निजी विद्यालय शिक्षक संघ, नेपाल लोकतान्त्रिक आयुर्वेद तथा प्राकृतिक चिकित्सक संघ, नेपाल लोकतान्त्रिक साना होटल व्यवसायी संघ, नेपाल लोकतान्त्रिक भाषा साहित्य लेखक संघ थप गर्न लागेको छ।
यी शुभेच्छुक संस्थाका नाममा भने केही केन्द्रीय सदस्यहरू तथा प्रदेश सभापतिहरूले फरक मत राखेका छन्।
लोकतान्त्रिक शब्द राखेको भन्दै गण्डकी प्रदेश सभापति शुक्रराज शर्माले विरोध गरेका थिए।
‘राष्ट्रियता, प्रजातन्त्र, समाजवादलाई बलियो बनाउने काममा कांग्रेस केन्द्रित हुनु पर्ने ठाउँमा लोकतन्त्र-लोकतन्त्र भनेका छौं। भ्रातृ संस्था, शुभेच्छुक संस्थाका नाममा लोकतान्त्रिक राखिएको छ, त्यसमा मैले विरोध गरेँ,’ शर्माले भने, ‘हाम्रो पार्टी राष्ट्रियता, प्रजातन्त्र, समाजवादको जगमा स्थापित पार्टी हो। जगलाई बलियो बनाउने कार्यक्रम चाहिन्छ। लोकतन्त्र भन्न हुन्न।’
उनले लोकतन्त्रको ठाउँमा प्रजातन्त्र राखिनुपर्ने तर्क गरेका छन्।
‘लोकतन्त्र भन्ने शब्द कम्युनिष्टहरूले रूचाएको र मन पराएको शब्द हो,’ उनले भने, ‘राष्ट्रिय पार्टी र नेपाल प्रजातन्त्र पार्टीबीच एकता गरेर नेपाली कांग्रेस स्थापित भएको हो। यसको जग राष्ट्रियता र प्रजातन्त्र थियो पछि मात्र समाजवाद थपेको हो। सिद्धान्तलाई बलियो हुने गरी संगठन बनाउनुपर्दछ। अनि मात्रै हामी आफ्नो खुट्टामा उभिन सक्छौं।’
कांग्रेसमा अहिले १३ भ्रातृ तथा १८ शुभेच्छुक संस्था छन्। अधिकांशको महाधिवेशन हुन सकेको छैन।