परराष्ट्र मन्त्रालयका नायब सुब्बाले संघर्ष समिति गठन गरेका छन्।
नायब सुब्बा बचाउ आन्दोलनमा ऐक्यबद्धता स्वरूप मंगलबार मन्त्रालय परिसरमा भेलाको आयोजना गरी नायब सुब्बाले संघर्ष समिति गठन गरेको बताएका छन्।
परराष्ट्र मन्त्रालय आधिकारिक ट्रेड युनियनका अध्यक्ष रमेश गैह्रेको संयोजकत्वमा गठित ७ सदस्यीय संघर्ष समितिमा मन्त्रालय, राहदानी विभाग तथा कन्सुलर सेवा विभागमा कार्यरत नायब सुब्बा सदस्य रहेका छन्। सदस्यहरूमा कुलचन्द्र अर्याल, भोजकुमार भट्टराई, गीता घिमिरे, दीपक शर्मा, सुरज अम्गाइ र दीपराज जोशी छन्।
संघर्ष समितिले नायब सुब्बा बचाउ आन्दोलनमा परराष्ट्र मन्त्रालयका नायब सुब्बाहरूको तर्फबाट समन्वय गर्ने आन्दोलन समितिका सदस्य कुलचन्द्र अर्यालले बताए।
परराष्ट्र सेवामा कार्यरत नायब सुब्बा तहका कर्मचारीहरूको वृत्ति विकासको अवस्था अत्यन्तै दयनीय हुँदा नायब सुब्बाबाटै अवकाश पाउने अवस्था रहेको, वैदेशिक तालिम तथा भ्रमणमा नायब सुब्बा तहका कर्मचारीहरूमाथि विभेद हुने गरेको भन्दै त्यसको अन्त्यका संघर्ष समितिले माग गरेको छ।
नियोग तथा मन्त्रालयमा रहेका दरबन्दीको अनुपात नमिल्दा सुब्बाहरूलाई नियोग सुब्बामा लामो समय लाग्ने गरेको, नायब सुब्बाहरूको वैदेशिक भत्ता अन्यन्त न्यून हुनुका साथै सन्ततिहरूको शैक्षिक भत्तामा समेत असमानता रहेकोले आफ्ना हकहित र वृत्ति विकासका माग पूरा गराउन संघर्ष समिति गठन गरिएको अर्यालले बताए।
संघर्ष समितिले आफ्ना माग पूरा गराउनका लागि परराष्ट्र मन्त्री तथा परराष्ट्र सचिवलाई ज्ञापनपत्र बुझाउनुका साथै आधिकारिक ट्रेड युनियन र अन्य पेशागत संगठनका पदाधिकारीसँग भेटघाट गर्ने कार्यक्रम समेत तय गरेको छ।
असमान तलब वृद्धि खारेज गरी समान रूपमा सबै दर्जाको तलब वृद्धि गर्नुपर्ने, राजपत्र अनंकित कर्मचारीहरूको समेत वृत्ति विकासको अवसर सुनिश्चित गरी संघीय निजामती सेवा ऐन जारी गर्नुपर्ने, निजामती सेवामा तहगत प्रणाली लागू गर्नुपर्ने लगायतका माग राखी देशभरका नायब सुब्बा तथा खरिदार तहका कर्मचारीहरू सोमबारदेखि आन्दोलनमा छन्।
आन्दोलन स्वरूप देशभरका नायब सुब्बाहरूले आज सामूहिक बिदा लिएका छन्।
परराष्ट्र मन्त्रालयका नायब सुब्बा पनि आज हाजिर नगरिकन मन्त्रालयमा भेला भई नायब सुब्बा बचाउ आन्दोलनमा सहभागी भएका हुन्।