स्थानीय निर्वाचनको केही दिन अघि भरतपुरमा एक व्यक्तिको हत्या गरेको आरोपमा पक्राउ परेका दुई युवालाई चितवन जिल्ला अदालतले पुर्पक्षका लागि थुनामा पठाएको छ।
वैशाख २५ गते साँझ साढे ७ बजेतिर भरतपुर-७ बस्ने 'काने' भनेर चिनिने अनिल परियारको धारिलो हतियार प्रहार गरी हत्या भएको थियो।
घटनाको अनुसन्धान पश्चात प्रहरीले विश्व भनेर चिनिने हेमन्त बाँस्तोला, राहुल परियार भन्ने सुनिल राउत र बिक्रम भन्ने रोहितप्रसाद सिलवाललाई पक्राउ गरेको थियो।
अदालतले बुधबार बाँस्तोला र राउतलाई पुर्पक्षका लागि कारागारमा राख्न आदेश दिएको हो। सिलवाल २० हजार रुपैयाँ धरौटीमा छुटेका छन्।
निर्वाचनको समयमा आफ्ना कार्यकर्ताको हत्या गरिएको भन्दै त्यतिखेर नेपाली कांग्रेसका कार्यकर्ताले भरतपुरमा प्रदर्शन गरेका थिए। घटनाको अनुसन्धानका क्रममा कांग्रेसकै भातृ संगठन तरूण दलका नेता बाँस्तोलाको संलग्नता देखिएको थियो।
तीनै जनालाई जेठ २४ गते पक्राउ गरेको र घटनामा संलग्न रहेका थप दिन जना फरार रहेको जिल्ला प्रहरी कार्यालयका प्रवक्ता डिएसपी नरहरि अधिकारीले बताए।
