प्रमुख प्रतिपक्ष दल नेकपा (एमाले) का अध्यक्ष केपी शर्मा ओलीले राष्ट्रपतिले संसदमा फिर्ता पठाएको नागरिकता विधेयकलाई जस्ताको तस्तै फिर्ता पठाउने सत्तारूढ गठबन्धनको निर्णयप्रति आपत्ति जनाएका छन्।
अध्यक्ष ओलीले संसदले एक पटक विचार गरोस् भनेर राष्ट्रपतिले पठाएको सो गम्भीर महत्वको विधेयकलाई संसद बाहिरै बसेर सत्तारूढ गठबन्धनले सो निर्णय गरेको भन्दै आक्रोश समेत व्यक्त गरे।
बुधबार ललितपुरमा आयोजित पार्टी प्रवेश कार्यक्रममा बोल्दै उनले संसदमा सो विधेयकको विषयमा बहस समेत गर्न नदिएर सत्तारूढ गठबन्धनले ‘आफूलाई खोपडी नभएको मसले’ को रूपमा प्रस्तुत गरेको जिकिर समेत गरे।
संसदीय अभ्यासको समेत ख्यालै नगरी सत्तारूढ गठबन्धनले आफ्नो बहुमतको तागत देखाइदिने भन्दै सो विधेयक राष्ट्रपतिलाई जस्ताको तस्तै फिर्ता पठाउने निर्णय गरेको अध्यक्ष ओलीको भनाइ थियो। सत्तारूढ गठबन्धनको सो निर्णयमा बहुमतको घमण्ड चढेको उल्लेख गर्दै उनले त्यस्ताहरूको हातमा देश चल्न नसक्ने बताए।
ओलीले भने, ‘नागरिकता विधेयक राष्ट्रपतिले संसदमा एकपटक विचार गरोस्, कमीकमजोरी नरहोस्। यो धेरै गम्भीर महत्वको प्रश्न हो भनेर फिर्ता पठाउनु भएछ। संसदमा होइन, बाहिर बसेर राष्ट्रपतिले फिर्ता पठाउनु भएपछि पाखुरी छामेर राष्ट्रपतिले फिर्ता पठाउने? जस्ताको तस्तै फिर्ता पठाउने। हिजो निर्णय गरे। संसदमा छलफल हुनै बाँकी छ। के छलफल हुन्छ अब। पाखुरेहरूले पाखुराको भाषा बोलिसके हिजै–जस्ताको तस्तै पठाइदिने। हाम्रो बहुमतको तागत देखाइ दिने। को हो राष्ट्रपति, संसदलाई विचार गर्नु भन्ने ? यस्ता घमण्डीहरूले तर्क छैन, तार्किकता होइन। बल, पाखुरा, मसलका कुरा गर्नेहरू । यस्तोले देश चलाउँछन्? देशको दुर्भाग्य हो यो। यो संसदीय अभ्यास नै होइन।’
उनले अगाडि भने, ‘संसदमा कांग्रेस होला, माओवादी केन्द्र भन्नेहोला। माधव नेपालको पार्टी होला। गठबन्धनको पार्टी होला नि संसदमा। त्यहाँ बहस गरे हुन्छ नि! अनि बाहिर यसै फिर्ता गर्ने निर्णय त भइसक्यो उनीहरूको। कस्तो संसदीय अभ्यास। विचारविमर्श नगर्ने, सोझै पठाइदिने–जस्ताको तस्तै। कुरा राम्रो, नराम्रोको मतलब छैन। हाम्रो पाखुराको कुरा हो यो। यस्तालाई सरकारका राख्नुहुन्छ? नेपाली जनताले। यी खोपडीमा टाउकामा नभएका, पाखुरामा मसल मात्रै भएका हुन्। खोपडीहीन मसले।’
अध्यक्ष ओलीले कांग्रेस लोकतान्त्रिक पार्टी नरहेको दाबी समेत गरे।
प्रचण्डको कार्यकर्ता बनेर हिँडिरहेको कांग्रेस आचरण, नीति र व्यवहार सबै हिसाबले लोकतान्त्रिक हुनै नसक्ने उनको तर्क थियो।
ओलीले विगतमा पनि कांग्रेसले देशविरोधी कार्य गर्दै आएको र पछिल्लो समय यसले लोकतान्त्रिक आचरण र व्यवहार समेत गुमाएको आरोप लगाए।उनले माओवादी केन्द्र पार्टी नभई प्रचण्ड एण्ड कम्पनी भएकाले त्यसको बारेमा टिप्पणी गरिरहन आवश्यक नै नरहेको दोहोर्याए।
अध्यक्ष ओलीले भने, ‘कांग्रेस अब कहीँकतै लोकतान्त्रिक पार्टी रहेन। कांग्रेसले लोकतान्त्रिक पार्टी हुँ भन्न अब बेकार छ। कांग्रेस प्रचण्डको कार्यकर्ता हो। अब अरू पार्टीहरूको चर्चा नगरौं। समय किन खर्च गर्नु? कांग्रेसमा लोकतान्त्रिक आचरण, नीति, सिद्धान्त, व्यवहार केही पनि रहेन। इतिहासमा पनि कांग्रेसले पटक/पटक अलोकतान्त्रिक क्रियाकलाप गरेर आएको पार्टी हो। देश हितका विरूद्ध अनेक क्रियाकलाप गरेर आएको पार्टी हो। त्यो कांग्रेस सुध्रिएला कि! अनुभवबाट सिक्ला कि भनेको। झनझन कांग्रेस बिग्रँदै गएको छ। माओवादी पार्टी भने प्रचण्ड एण्ड कम्पनी हो। यसले कुनै पार्टीको रूप नै लिएको छैन। र, कांग्रेस प्रचण्ड एण्ड कम्पनीको पछि-पछि त्यही नीतिमा लुरूलुरू हिँडी राखेको छ। त्यही व्यवहार र आचरणमा।’
अध्यक्ष ओलीले सत्तारूढ गठबन्धनले मुलुकलाई बर्बाद पार्ने भएकाले आगामी निर्वाचनमा आफ्नो पार्टीले बहुमत ल्याउनुपर्ने पटक/पटक दोहोर्याए।
