नेकपा एमाले अध्यक्ष केपी शर्मा ओलीले गठबन्धनमा रहेका पार्टीहरू बुढा भइसकेको बताएका छन्।
युवा संघ नेपालको कार्यक्रममा बोल्दै एमाले अध्यक्ष ओलीले गठबन्धनमा रहेका पार्टीहरू आयुअनुसार बुढा भएका दाबी गरे।
'हाम्रो एमाले युवा पार्टी हो। पोहोर बनेको भए पनि कुनैकुनै पार्टी बुढा हुन्। पहिला भुइँ खोस्रिने र सिँगौरी खेल्ने गरेको थियो,' नेकपा एकीकृत समाजवादीप्रति इंगित गर्दै उनले भने, 'अहिले हक्का गर्ने र सिँगौरी खेल्न छाडेको छ। मंसिर ४ पछि टोपी निकालेर हिँडेको देख्नुहुन्छ।'
उनले कांग्रेस बुढो भएको भन्दै जुरो र सिङ फुक्लिसकेको बताए। कांग्रेसले नक्कली सहयात्री लिएर हिँडेको भन्दै ओलीले गन्तव्य नभएका र मुद्दा लडेर सरकारमा जानेहरू मात्रै भएको बताए।
गठबन्धनमा रहेका दलहरूलाई चुनाव लडेर भन्दा पनि मुद्दामामिला गरेर सरकारमा पुग्ने सोच रहेको आरोप लगाउँदै उनले एमालेले जनमतका आधारमा सरकार बनाउने बताए।
'१४ महिनामा पाँच दलले रथ तान्छौं भनेका थिए। तर खै, केही भएन त! पाँच भाइलाई आफ्नो परिवारको मात्र चासो छ। मिलेर खाने अनि आफ्नो परिवार सपार्ने मात्र भयो। यो अवस्थाबाट देशलाई कसरी जोगाउने भन्ने हो,' उनले भने, 'यसको वैचारिक सांगठनिक नेतृत्व एमालेले लिन्छ। मंसिर ४ गतेको निर्वाचन सामान्य अवस्थामा आउने, जाने आवधिक निर्वाचन मात्र होइन, देश अँध्यारो र पाँच दलीय गठबन्धनको लुटतन्त्रमा जाने कि कानुनी राज्य र सुशासनमा जाने भन्ने हो।'
अविश्वसनीय देश र जातिका रूपमा नेपाललाई चिनाउनबाट एमालेले जोगाउने उनको दाबी छ।
