राजनीतिक दलका कर्णाली प्रदेश प्रतिनिधिहरूले निर्वाचनमा बालबालिकाको प्रयोग नगर्ने प्रतिबद्धता जनाएका छन्।
आसन्न प्रदेश तथा प्रतिनिधि सभाको निर्वाचनलाई लक्षित गर्दै बाल अधिकारका लागि साझा अभियानले आयोजना गरेको एक कार्यक्रममा सहभागी दलका प्रतिनिधिहरूले निर्वाचनमा बालबालिकाको प्रयोग आफूले नगर्ने र त्यसलाई रोक्न पनि भूमिका खेल्ने बताएका छन्।
बाल अधिकारको रक्षा गर्दै निर्वाचन आचारसंहिता अनुसार मात्र निर्वाचनमा दलहरू सहभागी हुने उनीहरूले बताए।
‘आउँदो निर्वाचनमा बालबालिकालाई प्रचारप्रसारमा लगाउने, पर्चा–पम्प्लेट बाँड्नेजस्ता कार्य गर्न लगायएको पाइने छैन, यदि त्यसो भयो भने प्रदेशमा मैले जिम्मा लिन्छु,’ राष्ट्रिय स्वतन्त्र पार्टीका प्रदेश सभापति धीरजबहादुर वलीले भने, ‘त्यस्तो गरिएको खण्डमा हामी नेता तथा कार्यकर्तालाई कारबाही पनि गर्छौं।’
निर्वाचनमा बालबालिका प्रयोग गरेका घटना सार्वजनिक गर्ने तर सम्बन्धित दल वा व्यक्तिलाई कारबाही नगर्ने परिपाटीले बालबालिकाको प्रयोग न्यूनीकरण गर्न समस्या भएको उनले बताए।
बालबालिकाको अधिकार संरक्षण र उनीहरूको विकासको लागि आफूहरू तत्पर रहेकोले निर्वाचनमा बालबालिका प्रयोग नगर्ने कुरामा प्रतिबद्ध रहेको नेकपा माओवादीका कर्णाली प्रदेश सदस्य अर्जुनकुमार कटुवालले बताए।
‘चुनावी माहोलमा बालबालिका प्रयोग भएकै छन्, त्यसलाई अन्त्य गर्न सबै दलहरूले प्रतिबद्धता जनाउनु आवश्यक छ,’ जनता समाजवादी खेमराज अर्यालले भने, ‘बालबालिकालाई चुनावमा प्रयोग हुन नदिनु हाम्रो दायित्व हो, हामी हाम्रो पार्टीका तर्फबाट त्यसो हुन दिँदैनौं।’
बालबालिकाहरू केही आशा र निर्वाचनको माहोलमा हुने र्यालीमा रमाइलो देखेर झण्डा बोक्ने गरेकाले यसलाई रोक्न विद्यालयबाटै शिक्षा दिनुपर्ने उनले बताए।
दलहरू सामाजिक अभियन्ता र सचेत नागरिकको सञ्जाल भएकाले बालबालिकाको संरक्षणमा ध्यान दिनुपर्ने नेकपा एमालेका प्रदेश सदस्य हरिहरनाथ योगीले बताए।
निर्वाचन आचारसंहितालाई तल्लो तहका कार्यकर्तासम्म पुर्याएर आगामी निर्वाचनमा बालबालिकाको प्रयोग नहुने वातावरण एमालेले सिर्जना गर्ने उनले बताए।
‘हामीले अघिल्लो स्थानीय तहको निर्वाचनमा पनि बालबालिकाको प्रयोग नगर्ने प्रतिबद्धता गरेका थियौं, अबको प्रदेश र प्रतिनिधि सभा निर्वाचनमा पनि त्यसलाई निरन्तरता दिन्छौं,’ राष्ट्रिय जनमोर्चाका प्रदेश सचिव पूर्णबहादुर शाहीले भने।
राष्ट्रिय प्रजातन्त्र पार्टीका प्रदेश सदस्य अशोक थापाले पनि आफ्नो दलले बालबालिकाको प्रयोग नगर्ने प्रतिबद्धता जनाए।
स्थानीय तहको निर्वाचन २०७९ मा सात वटा दलले बालबालिकाको प्रयोग लगायतका निर्वाचन आचारसंहिता विपरीत कार्य गरेको तथ्यांक छ।
उक्त निर्वाचनका बेला नेकपा एमालेबाट ४२, नेपाली कांग्रेसबाट ३५, नेकपा (एस) बाट २०, नेकपा माओवादी केन्द्रबाट १५, राष्ट्रिय प्रजातन्त्र पार्टीबाट ६, जनता समाजवादीबाट २ र स्वतन्त्र उम्मेदवारबाट ६ वटा आचारसंहिता उल्लंघन गरेका घटना छन्।
