एमाले उपमहासचिव प्रदिप ज्ञवालीले जनता समाजवादी पार्टी (जसपा) सँग आजै सहमति हुने दावी गरेका छन्।
बिहीबार सेतोपाटीसँग संक्षिप्त कुराकानी गर्दै एमाले उपमहासचिव ज्ञवालीले मिलाउन बाँकी विषयलाई आजै टुंगो लगाउने गरी शीर्ष तहमा छलफल हुने बताए।
‘हामीले धेरै विषय मिलाएका छौं। आजै शीर्ष नेताहरू बीचमा लिखित सहमति हुन्छ होला,’ उनले भने, ‘सिट संख्यामा पनि हामी धेरै अघि बढेका छौं। मिल्न बाँकी कतिपय क्षेत्रमा मित्रवत प्रतिस्पर्धा गर्ने समझदारी समेत भएको छ।’
गठबन्धनमा सिट बाँडफाँटको छलफल चलिरहेका बेला जसपा अध्यक्ष यादवले हिजोदेखि एमालेसँग पनि चुनावी तालमेल गर्ने कुराकानी अघि बढाएका थिए।
स्रोतका अनुसार एमालेले जसपालाई २५ सिट दिन तयार भएको छ। नमिलेका कतिपय स्थानहरुमा मित्रवत प्रतिसपर्धा गर्न दुवै दल तयार रहेको बताइएको छ। जसपा अध्यक्ष यादवले सत्ता पक्षसँगपनि संवाद कायमै रहेकाले औपचारिक सहमति नहुदासम्म केही भन्न नसकिने जसपाका एक नेताले बताए।