संयुक्त राष्ट्रसंघको जलवायु परिवर्तन शिखर सम्मेलन इजिप्टमा सुरू हुँदैछ।
आइतबार उद्घाटन हुने सम्मेलनलाई आयोजक राष्ट्र इजिप्टले जलवायु परिवर्तन नियन्त्रणका लागि महत्वपूर्ण र ऐतिहासिक रूपमा लिएको बीबीसीले जनाएको छ। सम्मेलनमा भाग लिनका निम्ति १ सय २० राष्ट्रबाट ३० हजार भन्दा बढी प्रतिनिधि सारम अलशेख सहरको रेड सि रिसोर्टमा भेला भएका छन्। यो सम्मेलनलाई कोप-२७ भनिएको छ।
यस वर्षको मौसमा देखिएका आकस्मिक बदलाब जलवायु परिवर्तनसँग प्रत्यक्ष रूपमा जोडिएकाले त्यहाँ छलफल हुने बताइएको छ। आइतबारको उद्घघाटन सत्रमा राष्ट्रसंघको जलवायु परिवर्तन मामिला प्रमुख साइमन स्टिल र इजिप्टका विदेशमन्त्री सामे शुक्रीले गर्नेछन्।
सोमबार विभिन्न मुलुकका प्रतिनिधिले सम्मेलनले तय गर्नुपर्ने नीतिका विषयमा पाँच मिनेटको सम्बोधन मार्फत सुझाव राख्नेछन्। गत वर्ष स्कटल्याण्डको ग्लास्गोमा भएको सम्मेलनमा विभिन्न प्रतिज्ञा गरिएको थियो।
ती मध्ये, धेरै प्रदुषण निम्त्याउने इन्धन कोइलाको कम प्रयोग गर्ने, २०३० सम्म वन विनाश रोक्ने, मिथेन ग्यास उत्सर्जन ३० प्रतिशतले घटाउने लगायत थिए।
सम्मेलनका लागि विश्वभरबाट प्रतिनिधि इजिप्ट आउने भएपछि स्थानीय अधिकारकर्मीहरूले प्रदर्शनको तयारी गरेका छन्। सन् २०१४ मा राष्ट्रपति अब्देल फताह अलसीसी सत्तामा आएसँगै ६० हजारलाई राजनीतिक प्रतिसोधका कारण कैदमा राखेको बीबीसीले उल्लेख गरेको छ। उनीहरूको रिहाको माग गर्दै अधिकारकर्मीहरूले प्रदर्शनको तयारी गरेका हुन्।