नेकपा एमालेका अध्यक्ष केपी शर्मा ओलीले एमालेले जहाँ टेक्यो, त्यहाँ विकास भएको दाबी गरेका छन्।
झापाको शिवगञ्जमा आयोजित चुनावी सभालाई सम्बोधन गर्दै एमाले अध्यक्ष ओलीले भने, ‘नेकपा एमालेले जहाँ हात हाल्यो अथवा जहाँ टेक्यो त्यहाँ विकास भएको छ।’
देशमा परिवर्तन, शान्ति सुव्यवस्था र लोकतान्त्रिक गणतन्त्र स्थापना गर्न लडेर बनेको पार्टी भएकोले यी उपलब्धीलाई रक्षा गर्न नेकपा एमाले एकमात्र राजनीतिक शक्ति भएको उनले दाबी गरे।
पूर्व-प्रधानमन्त्री ओलीले झापाको पहिलो विकास राजा महेन्द्रले पहिलो पटक २०२० सालमा बाटो खोलेर गरेको खुलासा गरे।
‘चन्द्रगढीबाट तत्कालीन पञ्चायत प्रशिक्षण केन्द्र कलवलगुडी, गरामनी, विर्ताबजार, घैलाडुब्ब डाँगीबारीदेखि शिवगञ्जसम्म धागो तानेजस्तै गरेर ल्याएका थिए। त्यतिबेला पूर्व-पश्चिम राजमार्ग र हुलाकी सडक बन्ने छाँट थिएन। यहाँका पुराना साथीलाई थाहा हुन सक्छ। त्यतिबेला अहिलेका जस्ता पक्की पुल थिएनन्। बाँसका लच्किने पुल थिए’, ओलीले भने, ‘राजा महेन्द्रले खोलेको बाटोलाई मंसिर ४ पछि एमालेले पूर्णता दिनेछ।’
कनकाई र विरिङ खोलामा पौडी खेलेर हुर्किएको मान्छे भएकोले यस ठाउँको माया अझै ताजै रहेको ओलीले बताए।
‘यहाँ भूमिगत हुँदाका स्मरण मेरो मानसपटलमा अझै ताजा छन्’, उनले भने।
झापामा १ हजार किलोमिटर नदी नालाको तटबन्ध गर्नुपर्ने छ। तर, जनता तटबन्ध कार्यक्रमको नामनिशाना वर्तमान सरकारले नामेट गरिदिएको ओलीले आरोप लगाए।
‘एमाले सरकारमा हुँदा जति ठेक्का लगाएको थियो त्यहाँ मात्र काम भइरहेको छ’, ओलीले भने, ‘तर मंसिर ४ पछि गठबन्धनले खारेज गरेका सबै लोकप्रिय कार्यक्रम एमालेले ब्युँताउने छ।’
सुकुम्बासी समस्याको समाधान गर्ने, विरिङ, रतुवा, कन्काईको तटबन्ध गर्ने कार्यलाई जनता तटबन्धन कार्यक्रम ब्युँताएर नियमितता दिने उनले बताए।
