मंसिर ४ को प्रतिनिधि सभा निर्वाचनमा नेकपा (एमाले) र नेकपा (माओवादी केन्द्र) का महासचिव पराजित भएका छन्। दुबै पार्टीमा महासचिवलाई अध्यक्षपछि शक्तिशाली पद मानिन्छ।
एमाले महासचिवले माओवादी केन्द्रका उम्मेदवारसँग पराजय व्यहोरे भने माओवादीका महासचिवले एमालेका उम्मेदवारसँग हार व्यहोरेका हुन्।
दाङ-२ बाट एमाले महासचिव शंकर पोखरेल पराजित भएका हुन् भने माओवादी केन्द्रका महासचिव देव गुरूङ लमजुङबाट पराजित भएका हुन्।
एमाले महासचिव पोखरेललाई माओवादी केन्द्रकी रेखा शर्माले हराएकी हुन्। उनले १ सय ९६ मतान्तरसहित पोखरेललाई पराजित गरेकी हुन्।
यता, माओवादी केन्द्रका महासचिव देव गुरूङलाई एमालेका उपमहासचिव पृथ्वीसुब्बा गुरूङले हराएका छन्। माओवादीका महासचिव गुरूङ ३ हजार ९८ मतान्तरले पराजित भएका हुन्।
उनले ३१ हजार ७ सय ८१ मतच ल्याए भने विजयी भएका एमाले उपमहासचिव गुरूङले ३४ हजार ९ सय ६९ मत ल्याएका छन्।
दुई कम्युनिष्ट पार्टीका महासचिव पराजित हुँदा नेपाली कांग्रेसका दुबै महामन्त्रीले भने जित हात पारेका छन्। कांग्रेस महामन्त्री गगन थापा काठमाडौं-४ र विश्वप्रकाश पोखरेल झापा-१ बाट एमाले उम्मेदवारसँग फराकिलो मतान्तरले विजयी भएका छन्।