दैलेखको गुराँस गाउँपालिकाले 'गाउँ प्रहरी' गठन प्रक्रिया थालेको छ।
गाउँ कार्यपालिकाको ११ औं गाउँसभाले गाउँ प्रहरी गठन गर्ने निर्णय गरेको हो। सभाबाट गुराँस गाउँ प्रहरी सञ्चालनसम्बन्धी कार्यविधि २०७९ पारित गरेको छ।
उक्त कार्यविधि र गुराँस गाउँपालिकाको संगठन तथा व्यवस्थापन सर्वेक्षण प्रतिवेदनको आधारमा प्रहरी गठनको काम थालनी गर्न गाउँ कार्यपालिकालाई अनुमति प्रदान गर्ने निर्णय गाउँ सभाबाट गरिएको छ।
पालिका भित्रका सार्वजनिक सम्पत्तिको रक्षा, विकास निर्माणमा हुने अवरोधको सामना, सभा–सम्मेलनलाई व्यवस्थित बनाउन गाउँ प्रहरी गठनको आवश्यकता देखिएको प्रवक्ता दीपेन्द्र वलीले बताए।
‘नेपाल प्रहरी माथिल्लो तहमा हुन्छ, उसले स्थानीय तहमा हुने सानातिना सामुदायिक काममा हात हाल्न नमिल्ने पनि हुन्छ,’ उनले भने, ‘त्यस्तो अवस्थामा हामीलाई गाउँ प्रहरी चाहिने भएकाले स्थानीय तहलाई दिइएको अधिकार उपयोग गर्ने निर्णय गरेका हौं।’
उनका अनुसार गाउँ प्रहरी संगठनमा १२ जनासम्म प्रहरी रहने गरी संगठन तथा व्यवस्थापन सर्वेक्षण गरिएको छ।
गाउँ सभाबाट यौनिक अल्पसंख्यक समुदायलाई सुविधा उपलब्ध गराउने कार्यविधि पनि पारित गरेको छ।
स्थानीय तहभित्र रहेको यौनिक अल्पसंख्यकहरूलाई आत्मनिर्भर बनाउन वस्तुगत सेवासुविधा उपलब्ध गराउनेगरी कार्यविधि बनाइएको हो।
‘भत्ताका रूपमा नगद दिने परिपाटीलाई कम गर्न खोजिएको छ,’ गाउँपालिकाका प्रवक्ता वलीले भने, ‘केही गर्न नसक्ने अवस्था भएकालाई भत्ता दिने हो, सक्नेलाई उत्पादनमा लगाउनुपर्छ भन्ने मान्यताका साथ यौनिक अल्पसंख्यकलाई पनि त्यसै आधारमा समेटेर कार्यविधि बनाइएको छ।’
गाउँपालिकाको संरक्षणमा रहेका राउटे समुदायका लागि पनि गाउँपालिकाले थप व्यवस्थित गर्न खोजेको उनले बताए।
उनीहरूलाई संघीय सरकारबाट आउने सेवासुविधा र भत्ता सोझै उपलब्ध गराइदिन प्रशासनमार्फत् आग्रह गरिएको वलीले बताए।
राउटे समुदायमा मदिरा सेवन प्रमुख समस्याका रूपमा देखिएकाले नियमनका लागि जिल्ला प्रशासनमार्फत् पालिकाले अनुरोध गरेको उनले जानकारी दिए।
गाउँ कार्यपालिकाले राउटे तथा लोपोन्मुख समुदायलाई सुविधा उपलब्ध गराउनेसम्बन्धी कार्यविधि, २०७९ पनि पारित गरेको छ।
११ औं हिउँदे अधिवेशनबाट गुराँस गाउँ कार्यपालिका मातहत सेवा करारमा रहेका सशर्त साझेदारी, आंशिक साझेदारी लगायतमा कार्यरत कर्मचारीहरूमध्ये कार्य सम्पादन मूल्यांकनमा उत्तीर्ण भएका कर्मचारीहरूलाई करार थप गर्ने निर्णय गरेको छ।
गाउँ सभाबाट गुराँस गाउँपालिकाको संगठन तथा व्यवस्थापन सर्वेक्षण प्रतिवेदन पारित गरेको छ।
यस्तै, साविकका जिल्ला विकास समितिबाट पालिकामा समायोजन भई सेवा करारमा काम गरेको कर्मचारीलाई व्यवस्थापन गर्न जिल्ला समन्वय समितिलाई आग्रह गर्ने निर्णय कार्यपालिकाले गरेको छ।
गुराँस गाउँपालिकाले हालसम्म ७९ वटा विभिन्न ऐन, कार्यविधि, निर्देशिका र सूचकहरू तयार गरेको प्रवक्ता वलीले जानकारी दिए।
