नेकपा एकीकृत समाजवादीको पाँचौं केन्द्रीय कमिटीको पूर्ण बैठकले संविधान र लोकतन्त्रको रक्षाका लागि एकताबद्ध हुन आग्रह गरेको छ।
निर्वाचनपछि पहिलोपटक काठमाडौंमा दुई दिनसम्म बसेको बैठकले मुलुकमा बढ्दै गएको राजनीतिक अस्थिरताले देशको राष्ट्रियता कमजोर भई संविधान र लोकतन्त्र संकटमा पर्न सक्ने खतरा रहेकाले सम्पूर्ण लोकतान्त्रिक र देशभक्त शक्तिलाई एकजुट हुन आग्रह गरेको प्रचार विभाग प्रमुख जगन्नाथ खतिवडाले जानकारी दिए।
समाजवादी कार्यदिशा अँगालेका सम्पूर्ण वामपन्थी र कम्युनिस्ट पार्टीलाई राष्ट्रिय सार्वभौमिकताको रक्षा गर्दै समाजवाद उन्मुख आर्थिक सामाजिक रूपान्तरणका लागि एक भएर अगाडि बढ्न जोड दिएको बैठकले जातीय विभेदको अन्त्य गरी सामाजिक समानता कायम गर्न माग गरेको छ।
मिलेनियम च्यालेन्जेज कर्पोरेसन (एमसिसी) को व्याख्यात्मक टिप्पणीअनुसार कार्यान्वय भए/नभएको अनुगमन गर्न उच्चस्तरीय सर्वदलीय संयन्त्र गठन गर्न माग गरेको बैठकले वामपन्थी आन्दोलनलाई एकजुट बनाउन पहल कदमी गर्ने, मुलुकमा शान्ति, स्थिरता र विकासका लागि नेतृत्वदायी भूमिका निर्वाह गर्ने निर्णय पनि बैठकले गरेको छ।
त्यस्तै पछिल्लो पटक विकसित राजनीतिक परिस्थिति एवं अन्तर्राष्ट्रिय घटनाक्रमका सन्दर्भमा छलफल गरेको बैठकले मुलुकमा विद्यमान आर्थिक संकटको न्यूनीकरण गर्न माग गरिएको छ।
बैठकले किसानलाई बीउबिजन, मलको व्यवस्था तथा सरकारले तोकेको मूल्यमा उनीहरूको धान खरिद गर्न सरोकार पक्षलाई आग्रह गरेको बैठकले विदेशी कृषि वस्तुको आयातमा नियमन गरी पीडित कृषकलाई राहत उपलब्ध गराउन माग गरेको छ।
बैठकले भ्रष्टाचार, कमिसन, भूमाफिया, विचौलियाविरुद्ध एकीकृत आन्दोलन सिर्जना गर्न सबै वर्ग, समुदायलाई आह्वान गरेको छ।
