सहरी विकास मन्त्री सीता गुरूङले प्राकृतिक प्रकोपमा परेर घरबिहीन भएकालाई बर्खाअघि नै आवास सुविधा पुर्याउन निर्देशन दिएकी छन्।
प्रकोप प्रभावितलाई बर्खाअघि नै सुरक्षित आवासको व्यवस्था गरिनुपर्ने उनले बताइन्।
आज मन्त्रालयमा भएको कार्यक्रममा बोल्दै उनले विपद प्रभावित भई घरबिहीन बनेका नागरिकलाई दुई महिनाभित्रै आवासको प्रबन्ध गर्न निर्देशन दिएकी हुन्।
‘संविधानले नै नागरिकलाई आधारभूत आवास सुविधाको कुरा मौलिक हककोरुपमा व्यवस्था गरेको छ। त्यससम्बन्धी कानूनी प्रावधान र अनुदानको व्यवस्थासमेत छ। संविधान र कानूनबमोजिम जसले सुरक्षित आवासको सुविधा पाउने हो, उसलाई वर्षा सुरू हुनुअगावै आधारभूत आवासको सुविधा पुर्याउनुस्,’ उनले भनिन्।
सुरक्षित नागरिक आवास कार्यान्वयन कार्यविधिअनुसार विपद्का कारण घरबारविहीन भएका परिवारलाई आवासका लागि जस्तापाता र सहुलियत दरको काठ लगायतका सामाग्री खरिदका लागि अनुदान दिने व्यवस्था छ।
विपन्न समुदायलाई घर निर्माणमा अनुदान दिने कार्यक्रम पनि छ। तर त्यस्तो अनुदान कार्यक्रम प्रभावकारी छैन। मन्त्री गुरुङले सरकारी लगानीबाट बढीभन्दा बढी परिणाम आउने गरी काम गर्न निर्देशन दिएकी छिन्।