जिल्लाका दुई नगरपालिकाहरु एकसाथ उपमहानगरपालिका घोषित भएपछि सुनसरी दुई वटा उपमहानगरपालिका हुने नेपालको एकमात्र जिल्ला बनेको छ।
मंगलबार बसेको मन्त्रीपरिषद् अन्तर्गतको सामाजिक समितिको बैठकले देशभर सात वटा उपमहानगरपालिका घोषणा गर्ने क्रममा सुनसरीको धरान र इटहरीलाई उपमहानगरपालिका बनाउने निर्णय गरेको हो। योसँगै पूर्वमा उपमहानगरपालिकाको संख्या तीन पुगेको छ।
उपमहानगरपालिका बनाउन इटहरीमा खनार, एकम्बा, पकली र हाँसपोसा गाविस गाभिएका छन् भने धरानमा विष्णुपादुका गाविस गाभिएको छ। इटहरीमा हाँसपोसालाई गाभ्ने वा नगाभ्ने भनेर स्थानियतहमा विवाद देखिएपनि अन्ततः हाँसपोसालाई समेत गाभेर लैजाने निर्णय गरिएको हो।
नयाँ उपमहानगरपालिका बनेको इटहरीमा २६ वटा र धरानमा २७ वडा बनाइने भएको छ। उपमहानगरपालिका बनेपछि धरान र इटहरीमा यतिखेर सर्वसाधारण तथा दलका नेतासाथै व्यापारीहरु खुसी भएका छन्। उनीहरुले नगरपालिकाको स्तरोन्नती हुनु नगरवासीकै लागि गौरवको कुरा भएको प्रतिक्रिया दिएका छन्।
यता उपमहानगरपालिका घोषणासँगै नगरवासीमा करको भार र दायित्व समेत बढेको चर्चा समेत गरिएको छ। तर यो नगरपालिकाको स्तरोन्नती भएको र बाँकी कुराहरु नगरको नगर परिषद्ले मिलाउने संघीय मामिला तथा स्थानियविकास मन्त्रालयका प्रवक्ता पूर्णचन्द्र भट्टराईले बताएका छन्।
'उपमहानगरपालिका बन्ने बित्तिकै आफैमा केही हुँदैन,' उनले भने, 'यसले भविष्यको बाटो निर्धारण गर्न मद्धत गर्छ।'
नगरपालिका घोषणा भएसँगै धरान र इटहरीका स्थानियवासीले खुसी व्यक्त गरेका छन्। 'अहिलेसम्म इटहरीको विकास भन्दा पनि धेरैले आफ्नो व्यक्तिगत विकासको बारेमा मात्र सोचे,' उपमहानगर घोषणाबाट खुसी लागेको भन्दै इटहरीका एमाओवादी नेता मदन चुँडालले भने, 'अब व्यक्ति नभइ नगरको विकासको लागि सबैले योगदान दिनुपर्छ।'
इटहरीकी मिनु न्यौपानेले समेत इटहरी नगरको प्रगतीले आफूलाई खुसी लागेको प्रतिक्रिया दिँदै भनिन्, 'अझै उन्नती, प्रगती होस्।' धरानमा प्राध्यापन गर्दै आएका प्राध्यापक कृष्ण कोइरालाले पनि खुसी लागेको बताउँदै भने, 'नेपालवासी सबै नगरवासी बन्ने भयौं, अब सोहीअनुसार विकास पनि अघि बढ्नुपर्छ।'
सरकारले मंगलबार मात्रै देशभरमा ६१ नयाँ नगरपालिका थप गरेको छ। योसँगै नेपालमा नगरपालिकाको संख्या एक सय ९१ पुगेको छ। सो क्रममा दुई सय ५८ गाविसवासीहरु नगरवासी बनेका छन्। अब देशभरमा तीन हजार २७६ गाविस मात्र बाँकी भएका छन्।
