२०४८, २०५१ र २०५६ सालमा गिरिजाप्रसाद कोइरालाको क्षेत्र मोरङ–१ बाट उम्मेदवार बन्ने छोरी सुजाताको इच्छा पुरा नहुने भएको छ । आसन्न संविधानसभा निर्वाचनका लागि क्षेत्र नम्बर १ बाट उनी प्रत्यक्ष र समानुपातिक दुवै तर्फ सिफारिशमा परिनन् ।
मोरङकै ४ नम्बर क्षेत्रबाट भएपनि प्रत्यक्ष वा समानुपातिक उम्मेद्वार बन्ने उनको इच्छा पनि अपुरै रहेको छ । त्यहाँको क्षत्रीय भेलाले पनि उनलाई उम्मेदवारमा सिफारिश गरेन ।
उम्मेदवारी सिफारिसमा नपरेपछि आक्रोशित हुँदै सुजाताले पिता गिरिजा सम्झँदै ऐतिहासिक ठाउँमा ‘ठूलो आक्रमण’ गरिएको र यसमा पार्टीभित्र केही व्यक्ति लागेको बताइन् ।
सोमबार विराटनगरस्थित जीपी फाउन्डेसनमा पत्रकार सम्मेलन गर्दै सुजाताले भनिन्, ‘राणशासन समाप्त पार्न मोरङबाट जसले बन्दुक बोकेको थियो, त्यो इतिहास बोकेको ठाउँमा ठूलो आक्रमण भयो, पार्टीभित्र केही व्यक्तिहरू गिरिजाबाबुको हिष्ट्री समाप्त गर्न लागेका छन्, तिनीहरू को–को हुन् ‘आइडेन्टीफाइ’ म गर्दैछु ।’ सुजाताले नेपाली कांग्रेसको राष्ट्रियता र समाजवादको इतिहासलाई समाप्त गर्नेगरी पार्टीका मान्छेले षडयन्त्र गरेको भन्दै उनीहरूको नाम समेत पर्दाफास गर्ने चेतावनी दिइन् ।
‘नेपाली कांग्रेसलाई सिध्याउन ठुलो गेम भइरहेको छ, म कार्यकर्तालाई सजग गराउन चाहन्छु,’ उनले भनिन्, ‘हामी सबैलाई सिध्याउने ठूलो षडयन्त्र भइरहेको छ र यति ठूलो डिक्टेटरसिप र तानाशाहीलाई अगाडि बढाइँदैछ पार्टी भित्रबाट यसको विरोधमा मैले बोल्नै पर्छ ।’
गलत तत्वलाई स्थापित गर्न पार्टीले जनआन्दोलनविरोधी र जुवाडेको नाम सिफारिस गरेको आरोप उनले लगाइन् । ‘क्षेत्र नं. ३ बाट जनआन्दोलन विरोधी र जुवाडेको नाम आएको छ,’ उनले भनिन्, ‘तीस वर्ष अमेरिका बसेका मान्छेको नाम आउँछ, तर हामी केटाकेटीदेखि दुःख गर्दै आएको मान्छेलाई समानुपातिकमा ल्याउनु भन्दा पनि नमान्ने के हो यो ?’
सुजाताकै भनाइअनुसार उनी यसपालिको निर्वाचनमा मोरङ क्षेत्र नं. १ बाट प्रत्यक्ष निर्वाचन लड्न चाहेकी थिइन् । यो क्षेत्र उनका पिता गिरिजाप्रसादको थियो । छोरी भएको नाताले उनी आफ्ना पिताकै क्षेत्रबाट उठ्न इच्छाएकी थिइन् । यही क्षेत्रमा प्रत्यक्ष नपाए पनि समानुपातिक उम्मेदवार बन्न खोजेकी थिइन् ।
‘मैले गिरिजाबाबु सम्झें, गिरिजाबाबुको ‘हिष्ट्री’ समाप्त गर्न केही व्यक्ति लागेका छन् । आमोद उपाध्यायको ‘ब्याकग्राउन्ड’ के हो ? उनले के मोरङ जिल्ला चलाएका छन् ? उनी राष्ट्रिय अन्तर्राष्ट्रिय नेता हुन् ? किन उनले बारम्बार बञ्चित गर्छन् हामीलाई ? के हुन् उनी ? उनी किन जहिल्यै गिरिजाबाबुको विरोध गर्थे ?,’ कडा रूपमा प्रस्तुत हुँदै सुजाताले भनिन्, ‘गिरिजाबाबु र उहाँको इतिहासलाई नै समाप्त पार्न खोजिँदैछ केही व्यक्तिबाट । कसरी कसले भनेर म अहिले भन्न सक्दिनँ ।’
उम्मेदवारीमा आफ्नो नाम सिफारिस नभएपछि उनले पार्टीको यस्तो गतिविधिमाथि छानविन गर्न माग गरेकी छिन् । ‘जिल्ला सभापतिले किन हामीलाई साथ नदिएर आमोदजीजस्तो मान्छेको कुरा सुनेर स्थान दिनुभयो, के हो सभापतिको कुरा ?,’ छेउमै रहेका जिल्ला सभापति अमृत अर्यालतिर औंल्याउँदै उनले भनिन्, ‘यो छानविन हुनुपर्छ, जित्ने मान्छेले टिकट पाउनुपर्छ, हार्नेले होइन, चाहे त्यो आमोद होस् चाहे अमृत अर्याल ।’ आमोद स्वर्गीय नोना कोइरालाका बहिनी ज्वाई हुन् ।
कांग्रेस स्रोतका अनुसार कोइराला परिवारकै व्यक्तिहरूको ‘जुँगाको लडाइँ’कै कारण सुजाताले टिकट नपाएकी हुन् । सुजाता, सभापति सुशीलका भाइ अशोक कोइराला र डा. शेखर कोइरालाको मोरङमा कोइराला परिवार उत्तराधिकारीको रूपमा को स्थापित हुने भन्ने ठूलो लडाइँ छ । सुजाता र शेखरका आ–आफ्नै गुट मोरङमा छन् ।
उनले जिल्ला पार्टी सभापतिलगायतलाई चुनावमा सहयोग गर्न अनुरोध गर्ने गरेकी थिइन् । पार्टी सचिव यदु विष्टका अनुसार सुजाताले अनौपचारिक रूपमा कुरा गरे पनि कुनै क्षेत्र ‘होल्ड’ गरेकी थिइनन् । ‘अरू सबैले आ–आफ्नो क्षेत्र होल्ड गर्नुभएको थियो, उहाँले गर्नुभएन,’ उनले भने, ‘भोलिपर्सी केन्द्रले सिफारिस ग¥यो भने आए भइहाल्छ नि ।’
सुजाताले उम्मेदवारी दिन इच्छा देखाएको क्षेत्र नं. १ बाट आमोदप्रसाद उपाध्याय उठ्दैछन् । अघिल्लो संविधानसभा चुनावमा उनले यही क्षेत्रबाट जितेका थिए । सुजाताले ताकेको ४ नम्बर क्षेत्रमा स्थानीय नेता मोदराज घिमिरे, गयानन्द मण्डल र सुमन कुँवरको नाम सिफारिस गरिएको छ । अरू कोही केन्द्रीय नेताको नाम नआएको क्षेत्रमा समेत नअँटाइएपछि सुजाता आक्रोशित बनेको एक नेताले बताए । ‘यो ठाउँमा उहाँ आँट्नुपथ्र्यो, तर के कारणले हो यसै भन्न सकिएन,’ ती नेताले भने, ‘गिरिजापुत्री भएका कारण सुजाता जिल्लाले आफैं नाम सिफारिस गरोस् भन्ने चाहना थियो । त्यसैले अन्तिम समयसम्म होल्ड गर्नुभएन ।’
क्षेत्र नं. ७ मा डा. शेखर कोइराला सुरक्षित भएका छन् । क्षेत्र नं. ६ मा केन्द्रीय नेता मिनेन्द्र रिजाल र महेश आचार्यको नाम सिफारिस भएको छ । अशोक कोइरालाको पनि यही क्षेत्रबाट सिफारिस भएको छ ।