नेकपा एमालेका सचिव प्रदिप ज्ञवालीले संघीय आयोगको सिफारिस र राजनीतिक दलहरुको सहमतिको आधारमा सीमांकनमा फेरबदल गर्न तयार रहेको स्पष्ट पारेका छन ।
रिपोर्टर्स क्लब नेपालले शनिवार आयोजना गरेको साक्षात्कारमा उनले भने,‘सीमांकन परिवर्तन गर्न हामी तयार छौ तर कस्ले र कसरी गर्ने भन्नेमा विवाद छ । आयोगले गर्दा राम्रो हुन्छ । कुन जिल्ला कहाँ राख्ने, कति टुक्र्याउने भन्ने कुरा अहिले गर्न सकिदैन । उहाँहरुले भने जस्तो भोली नै सीमांकन हुँदैन । उहाँहरुको प्रतिनिधिसमेत राखेर आयोग गठन गरेर अघि बढ्नु पर्छ ।’
ज्ञवालीले मधेसलाई पहाडसँग पुरै अलग गरेर दुई खाले राष्ट्रियता विकास गर्ने र एउटा जातिको मात्रै क्लष्टर हुने गरी जातीय राज्य बनाउने कुराबाहेक सीमांकनमा तलमाथि पार्दा केही फरक नपर्ने भन्दै देशलाई अप्ठ्यारोमा पारेर प्राप्त गरिने उपलब्धि दिगो हुन नसक्ने दावी गरे ।
मधेस आन्दोलनको स्पष्ट एजेण्डा नरहेको दावी गर्दै उनले भने,‘राजेन्द्र महतो अंगिकृत नागरिकता बाहकले राष्ट्रपति, प्रधानमन्त्री बन्न पाउनु पर्छ भन्नु हुन्छ, उपेन्द्र यादवजी त्यो हाम्रो मागै होईन भन्नु हुन्छ । मागको गन्तब्य प्रष्ट छैन ।’
सचिव ज्ञावलीले नेपाल पुरै भारतसँग निर्भर भएको भनि कमजोरी देखाई दिएकोमा भारतलाई धन्यबाद दिदै अब चीनसँग भारतको जस्तै ब्यापार र पारवहन सन्धी गर्ने तयारीमा सरकार रहेको जानकारी दिए ।
कार्यक्रममा बोल्दै नेपाली काग्रेसका केन्द्रीय सदस्य चन्द्र भण्डारीले भारतको छिमेकी नेपाल हो कि सिमित जिल्ला भनि प्रश्न गर्दै भारतको सुरक्षा चासो राख्ने विशेष, जानकार र विज्ञहरुसँग नेपालले गंभिर रुपमा छलफल गर्नु पर्नेमा जोड दिए । उनले भने,‘आठ जिल्ला र केही मान्छेलाई पकडेर भारतलाई कति फाईदा पुग्छ ? उसले सोच्नुपर्छ । भारतले स्थायी सम्बन्ध छाडेर अस्थायी सम्बन्ध राख्नु हुँदैन ।’
उनले हिमाल पारि सुतिरहेको सिंह रुपी चीनलाई नेपालमा भारतले किन आमन्त्रित गरिरहेको छ ? उसको विदेश नीति बुझ्न नसकेको भन्दै बुढो भईसकेको नेपालको हिमालले अब यस्तो अवस्थामा भारतको सुरक्षा गर्न नसक्ने स्पष्ट पारे ।
