चार वटा मधेशवादी दलहरुले मधेश आन्दोलनलाई चर्काउन भन्दै अर्को मोर्चा गठन गरेका छन्।
जारी मधेस आन्दोलनलाई सशक्त र थप प्रभावकारी बनाउन भन्दै शरदसिंह भण्डारीको नेतृत्वको राष्ट्रिय मधेश समाजवादी पार्टी, राजकिशोर यादवको नेतृत्वको मधेसी जनअधिकार फोरम गणतान्त्रिक, अनिल झाको नेतृत्वको नेपाल सदभावना पार्टी र तराई मधेस राष्ट्रिय अभियानले समावेशी मधेसी गठबन्धनका नाममा नयाँ मोर्चा गठन गरेका हुन्।
नयाँ मोर्चामा आवद्ध दलमध्ये राष्ट्रिय मधेश समाजवादी पार्टीसँग तीन जना तथा फोरम गणतान्त्रिक र सद्भावनासँग एक एक जना सांसद् छन्। तराई मधेस राष्ट्रिय अभियान भने भ्रष्टाचार गरेको प्रमाणित भएपछि जेल सजाय काटेका पूर्वमन्त्री जयप्रकाशप्रसाद गुप्ताको नेतृत्वमा छ।
चार दलका नेताले शनिबार जनकपुरमा पत्रकार सम्मेलन गरी गठबन्धनको घोषणा गरेका छन्। सरकार र सत्तारुढ दलहरुले मधेश आन्दोलनले उठाएका माग सम्बोधन गर्न गम्भिरता नदेखाएकाले गठबन्धन गठन गरेको चार दलका नेताले बताएका छन्।
चार दलका नेताले आफ्नो गठबन्धन संयुक्त लोकतान्त्रिक मधेशी मोर्चाको प्रतिस्पर्धी नभएको बताए।
