दमकका व्यवसायी खेमराज पौडेलको विभत्स हत्या गरिएको विरोधमा आज पनि झापाको पुरानो गौरीगंज बजार व्यवसायीले बन्द गराएका छन्।
बुधबारदेखि बजार व्यवसायीले स्वत:स्फुर्त रूपमा बन्द गराएका हुन्।
वाणिज्य संघले आज बिहान संघकै कार्यालयमा पत्रकार सम्मेलनको आयोजना गरी बजार बन्दको औपचारिक आह्वान गरेको हो।
वाणिज्य संघ गौरीगञ्जका अध्यक्ष मखना महतो गैदारले दमकमा कपडा व्यावसायी गर्ने कमल गाउँपालिका वार्ड नं ६ का खेमराज पौडेलको अपहरण गरी निर्ममतापूर्वक नियोजित हत्या गरेको विरोधमा बजार बन्द गरिएको जानकारी दिए। उनले दोषीलाई हदैसम्मको सजाय व्यवस्था गर्न पनि प्रशासनसँग माग गरे।
झापाको पश्चिम दक्षिण गौरीगञ्ज क्षेत्र केही समययता अपराधीहरूको ट्रान्जिट पोइन्ट बन्दैै गएकोमा स्थानीय व्यवसायीले प्रशासनको ध्यानाकर्षण गराएका थिए। व्यवसायी पौडेलले हत्या घटनाले समेत गौरिगञ्ज क्षेत्र अपराध गर्ने व्यक्ति वा समूहको ट्रान्जिट पोइन्ट भएको पुष्टि गरेकाले व्यापारीहरूको जिउधनको सुरक्षाको लागि जिल्ला तथा स्थानीय सुरक्षा निकायसँग व्यवसायीले माग गरे।
गौरीगञ्ज गाउँपालिकाका अध्यक्ष बाबुराजा श्रेष्ठले पनि गौरीगञ्ज गाउँपालिका अपराध गर्ने व्यक्ति वा समूहका लागि सुरक्षित स्थान बन्दै गएको स्वीकार गरे।
उनले भने, ‘पछिल्लो घटना क्रमले गौरीगञ्ज गाउँपालिका स्तब्ध भएको छ।’
उनले प्रशासनसँग व्यवसायीको सुरक्षाका लागि निगरानी बढाउन अनुरोध गरे।
दरबन्दी अनुसार ईलाका प्रहरी कार्यलय गौरीगञ्जमा सुरक्षाकर्मी नभएका कारण अपराधीहरूको मनोबल बढ्दै गएको उनले दाबी गरे। गौरीगञ्ज गाउँपालिका वार्ड नं ६ बस्ने सद्दाम हुसेनले व्यवसायी खेमराज पौडेलको शरीरका विभिन्न भागमा छुरा प्रहार गरी भदौ २६ गते सोमबार हत्या गरेका थिए।
व्यवसायी पौडेल हत्यामा संलग्न हुसेनलाई प्रहरी पक्राउ गरिसकेको छ। हत्याको कारणबारे अनुसन्धान भइरहेको र हुसेनविरुद्ध अपहरण तथा कर्तव्य ज्यान मुद्दामा कारबाही थालिएको प्रहरीले जनाएको छ।